პოლიტიკური პარტია “სტრატეგია აღმაშენებელი” გუშინ პარლამენტის წინ გამართულ აქციაზე აქტივისტების დაკავებას ეხმაურება, მწვავე შეფასებას აძლევს აღნიშნულ ფაქტს და მოითხოვს დაკავებული პირების გათავისუფლებას:
“გუშინ აქციაზე, სადაც მოქალაქეები სრულიად სამართლიანად და მშვიდობიანად აპროტესტებდნენ “რუსული კანონის” მიღებას 36 ადამიანი დააკავეს.
მსგავსი ქმედება და მოქალაქეების სრულიად უსაფუძვლოდ დაკავება, კიდევ ერთხელ არის ნათელი გამოვლინება, რომ საქართველოს ხელისუფლება რუსული, პუტინისტური რეჟიმის გზას ადგას, ებრძვიან თავისუფალ სიტყვას, ზეწოლას ახორციელებენ მოქალაქეებზე, ჟურნალისტებზე, არასამთავრობო ორგანიზაციის წარმომადგენლებზე.
ივანიშვილის რეჟიმის ასეთი ქმედება არის რუსული ძალოვანი სტრუქტურების ქმედების ანალოგიური.
ნათელია, ერთი და იგივე ხელწერით ებრძვიან დემოკრატიას და ცდილობენ საქართველო რუსულ ჭაობში დაბრუნებას.
ამიტომ მოვითხოვთ, დაუყოვნებლივ გაათავისუფლონ უკანონოდ დაკავებული ადამიანები!
მივმართავთ საქართველოს მოქალაქეებს, დღეს ისე როგორც არასდროს ახლოს ვართ ევროკავშირის წევრობასთან და ამ ისტორიულ არჩევანს სჭირდება დაცვა, ამიტომ თქვენი, ყველას აქტიურობა სასიცოცხლოდ მნიშვნელოვანია.
გვჯერა, საერთო ძალისხმევით შევძლებთ ჩვენი ევროპული არჩევანისა და უზრუნველყოფილი მომავლის გადარჩენას.
საქართველო არასდროს გახდება რუსეთი!
ქართველი ხალხის არჩევანი არის ევროკავშირი და ამ ბრძოლას აუცილებლად მოიგებს საქართველო”, – ნათქვამია “სტრატეგია აღმაშენებლის” მიერ გავრცელებულ განცხადებაში.
