,,სტრატეგია აღმაშენებლის” თავმჯდომარე გიორგი ვაშაძემ პარლამენტის პლენარულ სხდომაზე მწვავე შეფასებები გააკეთა მმართველი პარტიის მიერ გადადგმულ ნაბიჯებთან დაკავშირებით საქართველოს ევროინტეგრაციის გზაზე. ოპოზიციონერი ლიდერი კონკრეტული შეკითხვებით მიმართავს პრემიერ-მინისტრ ირაკლი ღარიბაშვილს:
,,დღეს საქართველო დგას ისტორიული არჩევანის წინაშე: ან ძლიერი ერთიანი საქართველო, ევროპული, ამერიკული, დასავლური ცივილიზაციის ნაწილი, ან დამონებული, დამორჩილებული, რუსეთის სატელიტი სახელმწიფო.
დღეს საქართველოში ორი დიდი იდეა ებრძვის ერთმანეთს – საქართველო, როგორც რეგიონალური ლიდერის და ძლიერი საქართველოს იდეა ან მაჩანჩალა პროვინციული საქართველოს იდეა.
ბატონო ირაკლი, მე თქვენთან მაქვს შეკითხვა – რატომ არ არის დღეს საქართველო ევროკავშირის წევრობის კანდიდატი ქვეყანა? რა მოხდა რომ მოლდოვამ, უკრაინაზე აღარაფერს ვამბობ, მიიღო ევროკავშირის კანდიდატის სტატუსი და ჩვენ, საქართველომ ვერ მივიღეთ? ხომ არ იკვეთება სწორედ ამ თქვენს ქმედებებში ის მოღალატეობრივი ქმედება, რის გამოც აგვაცილეთ ევროპისკენ მიმავალ გზას?
კონკრეტული ნაბიჯები – თავდასხმა ჩვენს დასავლელ პარტნიორებზე, განცხადებები, რომელსაც თქვენ აკეთებდით პირადად, თითქოს ევროკავშირის კანდიდატის სტატუსი არაფერი; მოსმენების კანონი, რომელზეც მთელი ევროპა გთხოვდათ რომ არ მიგეღოთ. თქვენ მაინც მიიღეთ; ნიკა გვარამია, რომლის დაკავება ჯერ ხომ აბსურდული ბრალდებით მოხდა და თქვენი ბრიუსელში ვიზიტის დღეს მიზანმიმართულად დააკავეთ; იყო თუ არა ეს გზავნილი, რომ საქართველოს არ უბა კანდიდატის სტატუსიო? რატომ ესხმოდით თავს დასავლელ პარტნიორებს?
დღევანდელ დღეს თქვენ გაქვთ ორი არჩევანი: ან ბოდიში მოიხადოთ ყველაფერი იმისთვის, რაც აქამდე გააკეთეთ ან ბოლომდე გააგრძელოთ თქვენი მოღალატეობრივი ქმედება…
საქართველოს მოქალაქეებს მივმართავ: ჩემო კარგებო, თქვენ კიდევ ვერ წარმოგიდგენიათ სიღრმე იმ ღალატის და ალბათ, ბოლომდე არ გვაქვს გაცნობიერებული, რა დონის ღალატთან გვაქვს საქმე?! ამ ადამიანებს უნდათ, რომ აგვაცდინონ ძლიერი საქართველოს იდეის გზას.
ჩვენი ერთიანობით, აუცილებლად შევძლებთ, რომ საქართველოს დავუბრუნოთ ის ისტორიული, სანუკვარი ძალა და დიდება, რომლისთვისაც ჩვენი წინაპრები იბრძოდნენ.
ღალატი ამ ქვეყნის თანაცხოვრება ვერ იქნება, ამ ქვეყნის თანაცხოვრება იქნება გამარჯვება“, – განაცხადა გიორგი ვაშაძემ.
ავტორი
ნინი ხიჯაკაძე
