„სტრატეგია აღმაშენებლის“ ლიდერი გიორგი ვაშაძე აქტიურად აგრძელებს შეხვედრებს ბრიუსელში ევროპარლამენტარებთან. დღეს ვაშაძემ მორიგი შეხვედრა ევროპარლამენტარებთან იანა ტუმისთან და ანა ფოტიგასთან გამართა.
ოპოზიციონერი ლიდერის თქმით შეხვედრის მთავარი საკითხები საქართველოს ევროკავშირში ინტეგრაციას და უკრაინისაკენ მიმართულ რუსულ აგრესიას ეხებოდა. როგორც გიორგი ვაშაძის აღნიშნავს, საქართველოს მიმართ ანა ფოტიგას და იანა ტუმის მხარდაჭერა უცვლელია და ევროპარლამენტარები ჩვენი ქვეყნის ევროკავშირში ინტეგრაციის დაჩქარებისთვის 19 აპრილის შეთანხმებაში არსებული რეფორმების დროულად გატარებისკენ მოუწოდებენ.
„შეხვედრა მქონდა ევროპარლამენტარებთან ანა ფოტიგასთან და იანა ტუმისთან, სადაც ვისაუბრეთ საქართველოს ევროკავშირში ინტეგრაციის გზაზე არსებულ პერსპექტივებზე და შევეხეთ უკრაინისაკენ მიმართულ რუსული აგრესიის საკითხს.
ევროპარლამენტარების ანა ფოტიგას და იანა ტუმის მხარდაჭერა ჩვენი ქვეყნის მიმართ კვლავ უცვლელია, ისინი მზად არიან ყველანაირი მხადაჭერა აღმოუჩინონ საქართველოს.
ევროპარლამენტარები აღნიშნავენ, რომ საქართველოს ევროკავშირში გაწევრიანების წარმატება პირდაპირ კავშირშია გასატარებელ რეფორმებთან, რომლის გატარებაზეც ვალდებულება საქართველომ და „ქართულმა ოცნებამ“ აიღო საკუთარ თავზე. ინტეგრაციის პროცესის დაჩქარების განმაპირობებელი ფაქტორი 19 აპრილის შეთანხმების პუნქტებში არსებული რეფორმების გატარებაა. ესენია: დემოკრატიული, საარჩევნო სისტემის, მართლმსაჯულების სისტემის და ძალაუფლების დემოკრატიულად გადანაწილების რეფორმები.
ისევე, როგორც წინა შეხვედრებზე ევროპარლამენტარებმა აქაც აღნიშნეს, რომ უამრავი კითხვა დაუგროვდათ „ქართულ ოცნებასთან“, რადგან სწორედ „ქართულმა ოცნებამ“ თქვა უარი იმ ვალდებულებების შესრულებაზე, რომლებიც უპირობოდ აუცილებელია საქართველოს ევროკავშირში ინტეგრაციის გზაზე“, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
