გარემოს დაცვისა და სოფლის მეურნეობის სამინისტროს ინფორმაციით:
2026 წლის იანვარი-ივნისის პერიოდში ექსპორტირებულია 7 ათასი ტონა, 73.5 მლნ აშშ დოლარის ღირებულების თხილი.
წინა წლის იანვარი-ივნისის პერიოდთან შედარებით, ექსპორტის ღირებულება გაზრდილია 50%-ით (24.4 მლნ აშშ დოლარით), რაოდენობა გაზრდილია 7%-ით (452 ტონით). აღნიშნულ პერიოდში, 1 კგ თხილის საშუალო საექსპორტო ფასი 10.6 $-ია, რაც 40%-ით აღემატება წინა წლის ანალოგიური პერიოდის მაჩვენებელს.
ასევე, აღსანიშნავია 2025-2026 მარკეტინგული წლის ჯამური ექსპორტის მაჩვენებელი. 2025 წლის 1 აგვისტოდან 2026 წლის 30 ივნისის ჩათვლით ექსპორტირებულია 18.1 ათასი ტონა, 184.9 მლნ აშშ დოლარის ღირებულების თხილი, ექსპორტის ღირებულება გაზრდილია 59%-ით (68.9 მლნ აშშ დოლარი), რაოდენობა კი 2%-ით (300 ტონა).
ბოლო წლებში მზარდია როგორც ექსპორტირებული თხილის მოცულობა, ისე მისი საექსპორტო ფასი, რაც ნაჭუჭგაცლილი თხილის ექსპორტის ზრდით აიხსნება.
ქართული თხილის ძირითადი საექსპორტო ბაზარი ევროკავშირია (იტალია, ესპანეთი, გერმანია, საფრანგეთი, პოლონეთი), სადაც 2025 წლის 1 აგვისტოდან 2026 წლის 30 ივნისის ჩათვლით ექსპორტირებულია 12.2 ათასი ტონა თხილი. ასევე, 1.4 ათასი ტონა თხილი ექსპორტირებულია სირიაში, 660 ტონა რუსეთში, 526 ტონა სომხეთში და სხვა ქვეყნებში.
