დღეს, 26 დეკემბერს გენერალურ პროკურატურასთან ქალმა პოლიტიკოსებმა წინასწარ პატიმრობაში მყოფ ქალს – ევა შაშიაშვილს – მარტოხელა დედას, შეზღუდული შესაძლებლობის მქონე შვილის მშობელს გამოვუცხადეთ სოლიდარობა და გენერალურ პროკურორს მოვუწოდეთ ევა შაშიაშვილისთვის აღკვეთი ღონისძიების სახით შეფარდებული პატიმრობა შეეცვალოს გირაოთი.
აღნიშნულ მოთხოვნას, მთელი დღის განმავლობაში, უერთდებიან კულტურის სფეროს წარმომადგენლები, შშმ პირთა თემის წარმომადგენლები, სინდისის პატიმრების მშობლები, საინიციატივო ჯგუფები და რიგითი მოქალაქეები.
არაერთი ონლაინ და სატელევიზიო მედიის მიერ მთელის დღის განმავლობაში შუქდება ამ საკითხის ირგვლივ გენერალურ პროკურატურაში და მიმდებარედ მიმდინარე მოვლენები.
იმ ფონზე, როდესაც საზოგადოებრივი ინტერესი ამ საკითხის მიმართ საკმაოდ მაღალია, საყურაღებოა და უზომოდ სამწუხაროა, რომ საზოგადოებრივი მაუწყებლის მხრიდან არანაირი ინტერესი საკითხის გაშუქების კუთხით არ ყოფილა, მაშინ როდესაც საუბარია განსაკუთრებულად მძიმე ჯანმრთელობის მდგომარეობის მქონე პატიმრობაში მყოფ მარტოხელა დედაზე და მის შეზღუდული შესაძლებლობების მქონე შვილის საჭიროებებზე, რომლისთვისაც მშობლის მზრუნველობა სასიცოცხლო მნიშვნელობისაა.
ჩვენ 18 საათამდე ვრჩებით პროკურატურის მოქალაქეთა მისაღებში, სადაც ვაგრძელებთ მუშაობასა და ბრძოლას ევა შაშიაშვილის თავისუფლებისთვის.
მოვითხოვთ, საზოგადოებრივმა მაუწყებლმა სრულყოფილად გააშუქოს აღნიშნული აქტუალური საკითხი და დაუყოვნებლივ ველოდებით გადამღებ ჯგუფს.
