პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარის დიმიტრი ხუნდაძის მიერ გაჟღერებულ ინიციატივას ეხმიანება “ახალი საქართველოს” სოციალური სამსახურის ხელმძღვანელი თეონა ჭალიძე და უმრავლესობის წევრს ახსენებს იმ მიმოწერას და აქტივობებს, რითიც სოციალურად დაუცველი მოქალაქეების პრობლემებზე ამახვილებდა ყურადღებას:
“როგორც იქნა მივიდა პარლამენტის ჯანდაცვის კომიტეტი და ჯანდაცვის სამინისტრო იმ დასკვნამდე, რომ სოციალურად დაუცველ ოჯახებს საარსებო შემწეობა გადამოწმების პერიოდში აღარ შეუჩერდეთ, რის შესახებაც დიმიტრი ხუნდაძემ განაცხადა.
,,ახალი საქართველოს“ სოციალური სამსახური თითქმის სამი წელია უწევდა ადვოკატირებას აღნიშნულ ინიციატივას. ჩვენ არაერთხელ მივმართეთ წერილობით ჯანდაცვის მინისტრებს, პარლამენტის ჯანდაცვისა და სოციალურ საკითხთა კომიტეტს, საკითხის შესასწავლად მივმართეთ სახალხო დამცველსაც, რადგან მიგვაჩნია რომ ირღვეოდა ათასობით ადამიანის უფლება, მაშინ როცა მათ სახელმწიფო სამი თვის განმავლობაში ულუკმაპუროდ ტოვებდა.
მედიის საშუალებით მუდმივად ვახსენებდით ხელისუფლებას ამ საკითხს და ყველა ეთერს ვიყენებდით იმისთვის, რომ სოციალურად დაუცველი ადამიანების მძიმე მდგომარეობა საარსებო შემწეობის შეჩერებით კიდევ უფრო არ დაემძიმებინა ხელისუფლებას.
მადლობას ვუხდი ყველა ჟურნალისტს და მედიას რომლებიც მუდმივად აშუქებდნენ ამ საკითხს.
კარგი იქნებოდა უფრო ადრე დაეჯერებინა ხელისუფლებას ჩვენთვის და მეტი პასუხისმგებლობა გამოეჩინა ყველაზე გაჭირვებულ მდგომარეობაში მყოფი მოქალაქეების მიმართ“ – აცხადებს თეონა ჭალიძე.