ამერიკაში მოღვაწე ქართველი პროფესორი დოდონა კიზირია ახალგაზრდების აქტივობებს ეხმაურება და კონკრეტულ ფაქტებს იხსენებს ისტორიიდან:
“დღევანდელი ამბების შემყურეს გამახსენდა ერთი დიდი გამარჯვება, რომელიც ქართველმა ახალგაზრდობამ მოიპოვა. ეს იყო ქართულის, როგორც სახელმწიფო ენის შენარჩუნება, როდესაც ბრეჟნევის დროს მოსკოვს სურდა მთლად გაერუსებინა საბჭოეთში შემავალი ყველა ხალხები.
ეს ნამდვილად საამაყო მონაპოვარია, თუ გავიხსენებთ, რომ მთელ ჩრდილო კავკასიაში ნაციონალური ენები გაქრობის პირზეა და სწავლა- განათლება, როგორც სკოლებში, ასევე უმაღლეს სასწავლებლებში რუსულ ენაზეა.
საქართველოს მოსახლეობა გასული საუკუნის 70-იან წლებში დაახლოებით ოთხი მილიონი იქნებოდა. შუა აზიის რესპუბლიკებში, რომელთა მოსახლეობა სამჯერ, ოთხჯერ და მეტჯერ უფრო დიდია, რუსული ენა დღემდე სახელმწოფო ენაა, თუმცა ფორმალურად ადგილობრივი ენაც სახელმწიფოდ ითვლება. სკოლებშიც და განსაკუთრებით უმაღლეს სასწავლებლებში სწავლება უმთავრესად რუსულ ენაზე მიმდინარეობს. ოთხმილიონიანი სათათრეთი სულ გარუსებულია. მხოლოდ 2010-15 წლიდან მოყოლებული დაწყეს ამ რესპუბლიკებში მშობლიურ ენაზე განათლების მიღების პროგრამირება, რაც ჯერ საკმაოდ შორს არის რეალიზაციიდან.
დღევანდელმა ახალგაზრდობამ არანაკლებ დიდი გამარჯვება უნდა მოიპოვოს. შუშაბანდის ვირთხა და მისი მსახური მანქურთები უსათუოდ დამარცხდებიან“, – წერს ფეისბუქის პირად გვერდზე დოდონა კიზირია.