საქართველოში მიმდინარე პროცესები სტრატეგიული პარტნიორების ყურადღების ცენტრშია მოქცეული. აქტუალურად განიხილება როგორც სანქცირების საკითხი, ასევე ხდება მხარდამჭერი ინიციატივების შეთავაზებაც, საქართველოს მოქალაქეების ინტერესებიდან გამომდინარე.
ამ მხრივ მნიშვნელოვანი იყო ოპოზიციონერი ლიდერის, „სტრატეგია აღმაშენებლის“ თავმჯდომარის გიორგი ვაშაძის ვიზიტი დიდ ბრიტანეთში და შეხვედრა ქვეყნის საგარეო საქმეთა მინისტრ დევიდ ქემერონთან. თავის მხრივ შეხვედრა უპრეცედენტოა, როცა მსოფლიოს ერთ-ერთი ლიდერი ქვეყნის საგარეო უწყების ხელმძღვანელი საქართველოს ოპოზიციური პარტიის ლიდერს შეხვდა და ასევე საყურადღებოა შემდეგი გარემოება, თუ ჩვენი ქვეყნისთვის განსაკუთრებით მნიშვნელოვან პერიოდში, რატომ შედგა ასეთი მაღალი დონის შეხვედრა დიდ ბრიტანეთში და რა “კულუარული” მსჯელობები იქნებოდა? მეორეს მხრივ აღსანიშნავია, ის დამოკიდებულება, რაც დიდი ბრიტანეთის მხრიდან განისაზღვრა საქართველოსთვის ასეთ რთულ პერიოდში:
„ვისაუბრეთ შექმნილ ვითარებაზე და რუსულ გავლენებზე, რომელიც იზრდება საქართველოში. ბრიტანეთი განიხილავს იმ საკითხს, რომ შეუერთდეს ამერიკის შეერთებულ შტატებს სანქცირების პოლიტიკის თვალსაზრისით იმ კონკრეტულ პირებთან მიმართებაში ვინც ცდილობს, რომ საქართველოს გადაახვევინოს ევროატლანტიკური ინტეგრაციის გზიდან“, – აცხადებს გიორგი ვაშაძე.
ოპოზიციონერი ლიდერი ასევე აღნიშნავს, რომ ბრიტანეთის საგარეო საქმეთა მინისტრთან შეხვედრაზე ყურადღება გამახვილდა ქართველი ხალხის არჩევანზე:
„მათთვის ძალიან მკაფიოა ქართველი ხალხის არჩევანი, რაც გამოიხატა პროტესტით და აქციებით და მეორეს მხრივ ძალიან მკაფიოა, რომ „ქართულმა ოცნებამ“ ფაქტიურად „ცივი ომი“ გამოუცხადა დასავლეთს“, – აღნიშნა გიორგი ვაშაძემ.
ბრიტანეთის საგარეო საქმეთა მინისტრთან უმნიშვნელოვანესი შეხვედრისა და ქართველი ხალხისადმი დასავლეთის მტკიცე მხარდაჭერიდან გამომდინარე, გიორგი ვაშაძე ქვეყნის ევრო-ატლანტიკური კურსის შენარჩუნებისთვის აუცილებელ პირობად საზოგადოების კონსოლიდაცია და 26 ოქტომბრის საპარლამენტო არჩევნებში ოპოზიციის გამარჯვება მიაჩნია.
