პარტია ,,დროას” თავმჯდომარე, ელენე ხოშტარია ჟურნალისტებთან განცხადებას აკეთებს ქვეყანაში მიმდინარე პოლიტიკურ პროცესებთან დაკავშირებით და ხელისუფლების მხრიდან დემონსტრანტების მიმართ დაშინებისა და ზეწოლის ფაქტებზე:
,,აბსოლუტურად ცხადია, რომ მრავალრიცხვოვანი, მრავალფეროვანი, ერთიანი, ძლიერი და უწყვეტი აქციებისგან შეშინებული ხელისუფლება ეძებს დაშინების, ბზარის შეტანის, ადამიანების ცალ-ცალკე მომწყვდევის სხვადასხვა რუსულ მეთოდს. ეს არის ზარები, რომელსაც მოქალაქეები ინტენსიურად, მასიურად იღებენ, დახვედრები, სასამართლოში დაბარებები – ადმინისტრაციული თუ სისხლის სამართლის წესით.
ასევე, ჩვენი არაერთი თანამოქალაქე უკვე არის დაკავებული და მე მინდა ამასთან დაკავშირებით გავაკეთო ,,გირჩი”/,,დროას” სახელით განცხადება.
პირველი, ეს მეტყველებს იმაზე, რომ ხელისუფლებას ეშინია ჩვენი, როცა ჩვენ ვართ ერთად;
მეორე, არც ერთი ჩვენი მოქალაქე არ დარჩება მარტო. ამ ბრძოლაში არავინ იქნება სისტემასთან მარტო;
მესამე, არასამთავრობო ორგანიზაციებს აქვთ ძალიან კარგად ორგანიზებული დახმარების სისტემა, კონკრეტული რჩევები.
ასევე, ძალიან მნიშვნელოვანია, რომ აღვრიცხოთ ყველა ის ადამიანი, რომელიც ამ [დაშინების] ზარებს ახორციელებს. საბოლოო ჯამში, ჩვენ მხარდაჭერასთან ერთად არის ძალიან დიდი საერთაშორისო მხარდაჭერა. ყველა ის სამართალდამცავი თუ პოლიტიკოსი, რომელიც ჩართულია ამ რეპრესიებში, აუცილებლად იქნება დასჯილი”, – განაცხადა ელენე ხოშტარიამ.
ავტორი
ნინი ხიჯაკაძე
