“დისკუსია გვქონდა 9 ნაბიჯის შესრულებაზე, ევროკომისიის დელეგაციის ხელმძღვანელობა ძალიან მკაფიო იყო და მათი განცხადებების ძირითადი ადრესატი ხელისუფლების წარმომადგენლები იყვნენ” – სერგო ჩიხლაძე

ევროკავშირის წარმომადგენლობის ოფისში, „ქართული ოცნებისა“ და ოპოზიციის წარმომადგენლების შეხვედრა ევროკომისიის დელეგაციასთან უკვე დასრულდა.

როგორც „სტრატეგია აღმაშენებლის“ საგარეო მდივანმა, სერგო ჩიხლაძემ ჟურნალისტებთან საუბრისას განაცხადა, შეხვედრაზე დელეგაციამ „ქართულ ოცნებას“ მკაფიოდ მიუთითა, რომ ვენეციის კომისიის რეკომენდაციები უნდა შესრულდეს.

მისივე თქმით, საუბარი სადამკვირვებლო მისიების საქართველოში გამოგზავნასაც შეეხო, რისთვისაც ხელისუფლებამ შესაბამისი პროცედურები თებერვლამდე უნდა დაასრულოს:

„დისკუსია გვქონდა 9 ნაბიჯის შესრულებაზე, ევროკომისიის დელეგაციის ხელმძღვანელობა ძალიან მკაფიო იყო და მათი განცხადებების ძირითადი ადრესატი ხელისუფლების წარმომადგენლები იყვნენ, რომ ვენეციის კომისიის მხრიდან რეკომენდაციები უკვე არსებობს, რაც პასუხობს რამდენიმე პუნქტის შესრულებას და შესაბამისად, ეს რეკომენდაციები უნდა შესრულდეს.

ოპოზიციის თხოვნაზე, რომ გრძელვადიანი სადამკვირვებლო მისიები დროზე უნდა ჩამოვიდნენ, ევროკომისიის დელეგაციის ხელმძღვანელმა ძალიან მკაფიოდ უთხრა „ქართული ოცნების“ წარმომადგენლებს, რომ ხელისუფლებამ სადამკვირვებლო მისიის მოსაწვევად დროულად უნდა დაიწყოს პროცედურების წარმოება და თებერვალში უნდა დასრულდეს ეს პროცესი.

ძირითადად საუბარი იყო, რომ ყველა პუნქტი უნდა შესრულდეს და შეფასების მორიგი დოკუმენტი შემოდგომაზე, ნოემბერში გამოქვეყნდება“, – განაცხადა ჩიხლაძემ.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს