მმართველი პარტიის ინიციატივას ცალკეული კატეგორიის მძღოლებისთვის განახორციელოს ფართომასშტაბიანი ამნისტია, კონკრეტული პოზიცია-შეფასებებით თუ შეკითხვებით ეხმაურება სამოქალაქო აქტივისტი, იურისტი ბაჩანა შენგელია:
“რა მაგალითს აძლევთ ამ ამნისტიით? დალიეთ საჭესთან, მიატოვეთ შემთხვევის ადგილი, დაარღვიეთ წლის განმავლობაში იმდენი, რომ ქულები გაგინულდეთ და ერთ მშვენიერ დღეს ამ ყველაფერს გაპატიებთ?
ამ უსამართლო ქვეყანაში აღარაფერი გვიკვირს, მაგრამ გზებზე არსებულ განუკითხაობას მაინც ნუ წაახალისებთ!” – წერს ბაჩანა შენგელია სოციალურ ქსელში.
ინფორმაციისათვის – მმართველი გუნდის განმარტებები:
“თუ პირს ალკოჰოლური სიმთვრალის გამო, შემთხვევის ადგილის მიტოვების გამო, ასევე, ნარკოტიკული საშუალების მცირე ოდენობით შეძენისთვის, ან მოხმარებისთვის ჩამორთმეული აქვს მართვის მოწმობა, ასევე, თუ ქულები გაუნულდათ, მათ 1-ელი იანვრიდან, აღუდგებათ მართვის მოწმობები, ალკოჰოლურის შემთხვევაში – 1-ელი თებერვლიდან. ხოლო სხვა პირებს, მაგალითად, ნარკოტიკების მოხმარების შემთხვევაში, თუ ისინი დინამიურ დასკვნას წარადგენენ და დადასტურდება, რომ აღარ არიან მომხმარებლები, იმ მომენტიდან აღუდგებათ მართვის მოწმობა და შეეძლებათ, თავიანთი სატრანსპორტო საშუალებით სარგებლობა“, – განმარტავს იურიდიულ საკითხთა კომიტეტის თავმჯდომარე, არჩილ გორდულაძე.
