„სტრატეგია აღმაშენებლის“ თავმჯდომარე, გიორგი ვაშაძე აშშ-ში გაემგზავრა, სადაც უსაფრთხოების ფორუმში მონაწილეობას მიიღებს.
ვაშაძის თქმით, ვიზიტის მთავარი მიზანი ქვეყანაში ინვესტიციების მოზიდვა, კონტაქტების დამყარება და კიბერ-უსაფრთხოების გაძლიერებისთვის გამოცდილების მიღებაა.
ფორუმის მთავარი თემა კიბერუსაფრთხოება და კრიპტო ტექნოლოგიური მიღწევებია. როგორც ცნობილია, ფორუმს სხვადასხვა ქვეყნის ლიდერები დაესწრებიან:
„ვაშინგტონში, სენატში გაიმართება უსაფრთხოების ფორუმი, რომელსაც სხვადასხვა ქვეყნის დელეგატები დაესწრებიან. რაც მთავარია, საუბარი გვექნება, უსაფრთხოებაზე, როგორც ფიზიკური, ისე კიბერ-უსაფრთხოების მხრივ. ძალიან ბევრს ვისაუბრებთ კრიპტო ტექნოლოგიებზე, თუ როგორ იცვლება მსოფლიო და რა შესაძლებლობები აქვთ ქვეყნებს ამ მხრივ.
ჩემი მონაწილეობის მიზანია, რომ გავაღრმავოთ კონტაქტები და ვიმუშავოთ იმ პერიოდისთვის, როცა „განქოცდება“ ქვეყანა და საქართველო განვითარებას გააგრძელებს ცივილიზებულ სამყაროსთან ერთად. ფორუმის გარდა, ამ საკითხებზე გვექნება ინდივიდუალური შეხვედრები, სადაც იქნებიან სენატის უმაღლესი დონის წარმომადგენლები, მათ შორის მარკო რუბიო და სხვები. ბევრი მნიშვნელოვანი შეხვედრა გვექნება, მივდივარ ჩვენი ქვეყნის ინტერესების დასაცავად“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
