,,სტრატეგია აღმაშენებლის’’ პოლიტიკური საბჭოს წევრი, სერგო ჩიხლაძე საგანგებო ბრიფინგზე განცხადებას აკეთებს რუსეთის მხრიდან გატარებულ პოლიტიკაზე, რომელიც საქართველოს განვითარებისა და ევროპული კურსის შეფარხებელი ნაწილი შესაძლოა გახდეს. ოპოზიციონერი ლიდერი ქვეყანაში შექმნილი მდგომარეობის გამო მწვავედ აკრიტიკებს მმართველ პარტიას და საზოგადოებას მოუწოდებს, რომ მოქმედების დროა:
,,როგორც ვხედავთ, რუსეთის და ივანიშვილის რუსული რეჟიმის ერთობლივი სპეცოპერაცია, რომლის მიზანიცაა საქართველოს რუსიფიკაცია – დასკვნით ფაზაში შედის.
გუშინ, ჩვენ, ნოდარ მელაძის ,,შაბათში“ ვნახეთ შოკისმომგვრელი ფაქტები, როგორ თანამშრომლობს კრემლი და რუსეთის სპეცსამსახურები პირდაპირ, პირადად ივანიშვილთან და მის რეჟიმთან; როგორ ერევიან საქართველოს საშინაო საქმეებში, მათ შორის, არჩევნების საკითხებში.
პარალელურად ჩვენ ვხედავთ, როგორ ხდება რუსეთის დამატებითი ექსპანსია საქარველოში უვიზო რეჟიმის დაწესებით და პირდაპირი ფრენების დაწყებით, რაც ივანიშვილის რუსული რეჟიმის სრული თანხმობით და მონაწილეობით ხორციელდება.
ამ ყველაფრის მიზანი არის საქართველოს სრული იზოლაცია დასავლეთისგან და რუსეთზე მიბმა პოლიტიკურად, ეკონომიკურად და რუსულ ორბიტაზე ჩატოვება.
მეგობრებო, დღეს ოხვრის, მითქმა-მოთქმის, აღშფოთებების დრო აღარ არის, ქმედებებზე უნდა გადავიდეთ. არჩევანი მარტივია – ვეგუებით ივანიშვილის რუსულ რეჟიმს საქართველოში, რუსულ ექსპანსიას, საქართველოს იზოლაციას, ევროკავშირისგან, NATO-სგან ათწლეულებით დისტანცირებას, არჩევნების მოპარვას?! – არა, რა თქმა უნდა!
რა არის გამოსავალი? – გამოსავალი არის ერთადერთი, ეს არის ყველა პარტრიოტი ქართველის, საქართველოს ყველა მოქალაქის, არა მარტო პოლიტიკოსების ან პარტიების, მობილიზება, ერთიანობა, ყოველდღიურ რეჟიმში წნეხი და პროტესტი ივანიშვილის რუსულ რეჟიმზე, რომლის საბოლოო მიზანიც უნდა იყოს რუსული რეჟიმის დემონტაჟი, თავისუფალი არჩევნების მოპოვება, ევროკავშირისა და NATO-სკენ სვლა, რაც არის ჩვენი სახელმწიფოებრიობის უსაფრთხოების და ჩვენი ეკონომიკური კეთილდღეობის გარანტია.
არა რუსულ რეჟიმს! არა ივანიშვილის რუსულ რეჟიმს! ეს უნდა იყოს ყველა პოლიტიკოსის, პატრიოტი ქართველის ყოველდღიური დღის წესრიგი!“, – განაცხადა სერგო ჩიხლაძემ.
ავტორი
ნინი ხიჯაკაძე
