“თითქოს არის 2 გზა, როგორც ზღაპრებში – ერთ გზაზე წახვალ დაიღუპები, მეორეზე – გადარჩები, ეს არის ცრუ დილემა!” – შალვა პაპუაშვილი

საქართველოს პარლამენტის თავმჯდომარე, შალვა პაპუაშვილი პოლიტიკურ შეფასებას აკეთებს ევროპარლამენტარ, ვიოლა ფონ კრამონის განცხადებაზე მიხეილ სააკაშვილთან დაკავშირებით და აცხადებს, რომ დღის წესრიგში არ დგას არჩევანი სააკაშვილსა და ევროკავშირს შორის:

,,თითქოს არსებობდეს არჩევანი სააკაშვილსა და ევროკავშირს შორის. ასეთი არჩევანი – არ არსებობს. უნდათ ქართველი ხალხი დააყენონ ცრუ არჩევანის წინაშე, თითქოს არის 2 გზა, როგორც ზღაპრებში – ერთ გზაზე წახვალ დაიღუპები, მეორე გზაზე – გადარჩები.

ეს არის ცრუ დილემა, ზღაპრებში რომელიც გვხვდება. სწორედ ეს არის მთელი ცინიზმი ასეთი დილემებისა. მისი მიზანი არის არაკეთილსინდისიერი. ეს მიზანი ვიცით – მიხეილ სააკაშვილის დახსნა სასჯელისგან.

ის თავისუფლად გადაადგილდებოდა სხვადასხვა ქვეყანაში და როდესაც სისხლის სამართლის დამნაშავეს აძლევ ლეგიტიმაციას, ასე ვთქვათ, სალონურ შეხვედრებზე, კონფერენციებზე, სემინარებზე თუ სხვა ასეთ ღონისძიებებზე მიწვევით, ეს თავისთავად არ არის ევროპული ქცევა“, – განაცხადა შალვა პაპუაშვილმა.

ინფორმაციისთვის: ევროდეპუტატმა ვიოლა ფონ კრამონმა კრიტიკული განცხადება გააკეთა საქართველოს ხელისუფლების მიმართ. მის შეფასებით, ქართველი ხალხის ინტერესი არ არის საქართველოს მე-3 პრეზიდენტის, მიხეილ სააკაშვილის ციხეში სიკვდილი, ხოლო თუ საქართველოს სურს ევროკავშირში გაწევრიანება და კანდიდატი ქვეყნის სტატუსი, ისე უნდა მოიქცეს, როგორც ევროპას შეეფერება.

ავტორი
ნინი ხიჯაკაძე