“სტრატეგია აღმაშენებლის” თავმჯდომარე, გიორგი ვაშაძე “ქართული ოცნების” თავმჯდომარის, ირაკლი კობახიძის განცხადებას ეხმაურება და აცხადებს, რომ მმართველი პარტია და მისი ლიდერი ხალხის 85%-იან ნებას საქართველო გახდეს ევროკავშირის ნაწილი, ტყუილებს უპირისპირებს:
“ირაკლი კობახიძის მიერ გაკეთებული განცხადება, რომ თითქოს დასავლეთი ქართულ საზოგადოებას აყენებს დილემის წინაშე – ან მშვიდობა ან ომი და ევროპაში ინტეგრაცია, არის ანტისახელმწიფოებრივი და ემსახურება ხალხის დაშინების რუსულ ინტერესებს.
ირაკლი კობახიძე და „ქართული ოცნება“ ვერაფრით უპირისპირდებიან საზოგადოების 85%-იანი ნაწილის ნებას, რომ საქართველო უნდა გახდეს ევროკავშირის ნაწილი და დეოლიგარქიზაცია და დემოკრატია ერთმანეთთან შეუთავსებელია, რაც პირდაპირ გულისხმობს, ბიძინა ივანიშვილის ძალაუფლებისგან ჩამოშორებას.
სწორედ ამიტომ, იგონებენ ტყუილს, რომ დასავლეთი ომს გვთხოვს და საქართველოს მოქალაქეებმა უნდა გააკეთონ არჩევანი ომის დაწყებასა და ევროპაში ინტეგრაციას შორის, ანუ კობახიძის ლოგიკით, დეკემბერში როცა უარს გვეტყვიან საბოლოოდ, კი არ უნდა გავბრაზდეთ ხელისფლებაზე, უნდა გაგვიხარდეს რომ ომს აგვაცილეს.
გამოსავალი მარტივია, არაძალადობრივი პროტესტის ფორმებით, საზოგადოების აქტიური მონაწილეობით, „ქართული ოცნება“ რაც შეიძლება მალე უნდა ჩამოვაშოროთ ხელისუფლებას და დავიწყოთ ქვეყნის აღმშენებლობისა და ევროპაში ინტეგრაციის შეუქცევადი პროცესი”, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
