პარლამენტის პლენარულ სხდომაზე დეპუტატებმა სახალხო დამცველის მიერ წარმოდგენილი ანგარიში განიხილეს და შეაფასეს. “სტრატეგია აღმაშენებლის” თავმჯდომარემ ყურადღება გაამახვილა ქვეყანაში არსებულ უსამართლობაზე და ასევე პირობა დადო ამხილოს ყველა ის, ვინც ხალხს ძარცვავს:
„487 გვერდი იმ მძიმე რეალობის, რომელიც დღეს ქვეყანაშია. სახალხო დამცველმა ჩვენ წარმოგვიდგინა დოკუმენტი, რომელშიც საუბარია, რომ საქართველოში დღეს დარღვეულია ბავშვთა უფლებები, დარღვეულია ქალთა, პენსიონერთა, შშმ პირთა, დევნილთა, ვეტერანთა, სტუდენტთა თუ მოსწავლეთა უფლებები, ძალიან ბევრი მოქალაქის უფლება. საქართველოში დაცულია მხოლოდ და მხოლოს “ქართული ოცნების” ელიტის, მათი ნათესავების თუ მათთან დაახლოებული პირების უფლებები.
2012 წელს როცა „ქართული ოცნება“ მოვიდა ხელისუფლებაში მთავარი გზავნილი იყო სამართლიანობის აღდგენა. ვისთვის აღდგა სამართლიანობა როცა ამდენი დარღვევაა?!
სამართლიანობა აღდგა მხოლოდ და მხოლოდ „ქართული ოცნების“ ელიტისთვის, ხალხი კი გაღარიბდა. ეს არის სრული სურათი იმ მძიმე ვითარების, რომელიც დღეს არის ქვეყანაში. ჩვენ ვიმუშავებთ აბსოლუტურად ყველა მიმართულებით, ქვეყნის შიგნით და ქვეყნის გარეთ ჩვენ ვიქნებით იმ მნიშვნელოვანი საკითხების გამტანი, რომელზეც თქვენ მუშაობთ ამ წლების მანძილზე.
სახალხო დამცველის ინსტიტუცია არის ერთადერთი ინსტიტუცია საქართველოში, ვინც ვერ დაშალა და ვერ გადაიფორმა „ქართულმა ოცნებამ“. ჩვენ, სტრატეგია აღმაშენებელი ყოველთვის ვიქნებით ხალხის მხარეს, ყოველთვის ვამხელთ ყველას ვინც ხალხის ხარჯზე მდიდრდება და ვინც ძარცვავს ამ ქვეყანას“, – განაცხადა გიორგი ვაშაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს