ელენე ხოშტარიას გადაწყვეტილებას, პარტია „ევროპული საქართველოს“ დატოვების შესახებ სხვადასხვა ოპოზიციური პარტიის ლიდერები გამოეხმაურნენ.
„თანამედროვე მსოფლიოში პოლიტიკოსები გადადიან პარტიიდან პარტიაში, ბლოკიდან ბლოკში, ჯგუფიდან ჯგუფში, მთავრობიდან ოპოზიციაში. ელენე არის ძალიან მებრძოლი ქალბატონი. მან თავისი სახელი უკვე ჩაწერა ისტორიაში შესანიშნავი კონტექსტით. დარწმუნებული ვარ, ის ოპოზიციაში ისეთივე ბრძოლას გააგრძელებს, როგორც ამას “ევროპულ საქართველოში” აკეთებდა“, – განაცხადა „ლეიბორისტული პარტიის“ ლიდერმა შალვა ნათელაშვილმა.
„ნაციონალური მოძრაობის“ ერთ-ერთი ლიდერი ხატია დეკანოიძე სოციალურ ქსელში ეხმაურება ელენე ხოშტარიას გადაწყვეტილებას:
„ელენე ხოშტარია არა მხოლოდ ერთ-ერთი გამორჩეული პოლიტიკოსია მთელს პოლიტიკურ ისტებლიშმენტში, არამედ უიშვიათესი ადამიანია, რომლის შეუპოვრობა მართლაც საოცრად დასაფასებელია.
წარმატებები შენ. ზუსტად ვიცი, რომ ბრძოლას არასდროს მიატოვებ.. მიყვარხარ და მთავარი ბრძოლის “ბარიკადებამდე”! ❤️“ – წერს ხატია დეკანოიძე ფეისბუქის პირად გვერდზე.
ფაქტთან დაკავშირებით, ასევე სოციალურ ქსელში, ინტერნეტგამოცემა “ტაბულას” დამფუძნებელმა თამარ ჩერგოლეიშვილმაც გამოაქვეყნა პოსტი:
„წარმატებებს ვუსურვებ აქტივიზმში, თუ სადაც არ უნდა იყოს – ელენე კარგი ადამიანია. მე კი მირჩევნია კარგი ხალხი პოლიტიკური ლიდერები იყვნენ და პოლიტიკურ პროცესზე ჰქონდეთ დიდი გავლენა, მაგრამ…“, – წერია პოსტში.
ავტორი
ნუცა ჯოხაძე
