“მათ ქვეყნის ინტერესებთან არანაირი თანხვედრა არ აქვთ, ისინი პირდაპირ უცხო ქვეყნის და კონკრეტული ადამიანების გავლენების გამტარებლები არიან” – კახა კალაძე არასამთავრობო ორგანიზაციების განცხადებაზე

თბილისის მერი კახა კალაძე მედიასთან გამოეხმაურა ნაწილი არასამთავრობო ორგანიზაციების მიერ გამოქვეყნებულ განცხადებას, სადაც საქართველოს ხელისუფლების პოლიტიკას აკრიტიკებენ.

მისივე განმარტებით, მსგავს არასამთავრობო ორგანიზაციების ქსელს ქვეყნის საწინააღმდეგო ქმედებებისთვის ქმნიან, რის შესახებაც საზოგადოებისთვის უკვე ყველაფერი ნათელია.

„ვიცით, როგორ იქმნებოდა აღნიშნული ქსელი – ასეულობით მილიონი იხარჯებოდა ქვეყანაში, რომ ამ ტიპის ორგანიზაციები რომ შექმნილიყო. ნომრიანი აგენტები არიან, ყველაფერი გაშიფრულია. საზოგადოება ფლობს ამ ინფორმაციას, ვინ ვინ არის, გიგაურები და ა.შ. რა არის მათი წარსული, რა დამოკიდებულება ჰქონდათ საქართველოზე. ისინი პირდაპირ უცხო ქვეყნის და კონკრეტული ადამიანების ინტერსების გამტარებლები არიან. ქვეყნის ინტერესებთან არანაირი თანხვედრა არ ჰქონიათ.

თუ შეიძლება ვინმეს უწოდო მოღალატე – არასამთავრობო ორგანიზაციები და ის პოლიტიკური პარტიები არიან, რომლებიც შემჩნეულები არიან ქვეყნის საწინააღმდეგო ქმედებებში“, – განაცხადა კახა კალაძემ.

ინფორმაციას თბილისის მერიის პრესცენტრი ავრცელებს