ტელეკომპანია “იმედის” ეთერში, საინფორმაციო გადაცემა “ქრონიკისთვის” მიცემულ ინტერვიუში, სამების საკათედრო ტაძარში სტალინის გამოსახულების შემცველი ხატის დაბრძანებასთან, ნატა ფერაძის მიერ მისი საღებავით დაზიანებასა და ამის გამო ალტ-ინფოს აქტივისტების მხრიდან მწვავე რადიკალურ ქმედებებთან დაკავშირებით შეფასება-განმარტებები გააკეთა საქართველოს სახალხო დამცველმა, ლევან იოსელიანმა:
“ვიტყვი, რომ ჩემთვის აბსოლუტურად მიუღებელია ის, რაც ჩვენ ვიხილეთ სამების საკათედრო ტაძარში და მე საერთოდ, ცოტა მეგულება ადამიანი, ვინც მოიწონებდა ამ საქციელს.
არ უნდა დაგვავიწყდეს, რომ საქართველო არის რელიგიური ქვეყანა. ეს არის მრავალეთნიკური, მრავალკონფესიური, რელიგიური ქვეყანა ამიტომ ასეთი ტიპის ქმედებები საკმაოდ სენსიტიურია, საშიშია, ბევრი ადამიანის რელიგიური გრძნობების შეურაცხყოფას იწვევს და განსაკუთრებული სიფრთხილეა მართებს ყოველთვის, ასეთ ნაბიჯებს დგამს და ასეთ გადაწყვეტილებებს იღებს.
ამიტომ კიდევ ერთხელ ვამბობ, აბსოლუტურად მიუღებელია ჩემთვის, როგორც ქრისტიანისთვის, ადამიანისთვის ის, რაც იქ ვიხილეთ.
მაგრამ, ამავე დროს, არ უნდა დაგვავიწყდეს, რომ ასევე არასწორია ადამიანების ლინჩის წესით გასამართლება სამართლებრივ სახელმწიფოში, დემოკრატიულ საზოგადოებაში. როგორი მიუღებელიც უნდა იყოს ვიღაცის ქმედება, არ შეიძლება მიუვარდე მას სახლში და გადაწყვიტო მასზე ძალადობა და მისი გასამართლება ასეთი მეთოდით. ამისთვის არსებობს სახელმწიფო და კანონის ფარგლებში უნდა მოხდეს ამ ყველაფრის დარეგულირება.
ამავე დროს, ჩემთვის ასევე მიუღებელია სტალინის ხილვა ქართულ მართლმადიდებლურ ეკლესიაში. გასაგებია, ეს არ არის ხატი, მაგრამ რა ფორმითაც არ უნდა იყოს, ვფიქრობ, რომ ის არ იმსახურებს იყოს იმ ადგილას, რასაც მთელი ცხოვრება ებრძოდა – ანგრევდა, ხვრეტდა, ანადგურებდა და ის აკეთებდა ამას არა მხოლოდ მართლმადიდებლური ეკლესიის წინააღმდეგ, აკეთებდა ასევე სხვა რელიგიების წინააღმდეგაც“, – განაცხადა ლევან იოსელიანმა.
