ქვეყანაში მიმდინარე პოლიტიკური პროცესების შეფასებას ახდენს პარტია “ევროპელი დემოკრატების” პოლიტიკური საბჭოს თავმჯდომარე, საგარეო საქმეთა მინისტრის ყოფილი მოადგილე ნიკოლოზ ვაშაკიძე:
“ვითარება საზოგადოებაში ძალიან დაძაბულია. ცოტა მიწყნარებულზე ჯერ ღარიბაშვილის უაღრესად აგრესიული ინტერვიუ შემოაგდეს და შემდეგ კობახიძის კიდევ უფრო აგრესიული განცხადება. ახლა ალტინფომ პარლამენტის წინ ევროკავშირის დროშა ჩამოგლიჯა და დაწვა. შეუფერხებლად.
ცხადია, რომ ალტინფო ამას ხელისუფლებასთან შეთანხმების, ან, უფრო სწორად,მისგან დავალების გარეშე, არ გააკეთებდა. პრაქტიკულად, ოდნავ მინავლებულ ცეცხლზე ფიჩხების და შეშის შეყრა ხდება.
თუ გავითვალისწინებთ, ასევე, იმას, რომ ის ავადსახსენებელი კანონპროექტი, რომელმაც ააფეთქა ქვეყანაში სიტუაცია, არანაირ გადაუდებელ აუცილებლობას არ წარმოადგენდა და, თანაც, სახელწოდებაც ხაზგასმით პროვოკაციული ჰქონდა შერჩეული, მარტივად შეგვიძლია დავასკვნათ, რომ ხელისუფლება შეგნებულად ახდენს ქვეყანაში დესტაბილიზაციას.
საკითხავია, რატომ? რაღაც ვირეშმაკულ თამაშთან გვაქვს საქმე, რომელიც შეიძლება ამ თამაშის მომწყობების კონტროლიდან გამოვიდეს. რამდენ მავნებლურ და უპასუხისმგებლო ექსპერიმენტს უნდა გაუძლოს ამ საწყალმა ქვეყანამ?” – წერს ფეისბუქის პირად გვერდზე ნიკოლოზ ვაშაკიძე.
