პარტია “სტრატეგია აღმაშენებლის” გენერალური მდივანი, პარლამენტის წევრი პაატა მანჯგალაძე პარლამენტში მმართველი პარტიის ლიდერების მხრიდან გაკეთებულ ანგარიშს ეხმაურება და ხელისუფლებას კონკრეტული პრობლემებისკენ მიუთითებს:
“ის რაც დღეს პარლამენტში ვნახეთ არის ცრუ საქმის და ცრუ საქმიანობის ანგარიში, რომ თითქოს 298 კანონი მივიღეთ და ამით ქვეყანა განვითარდა.
როცა ყოველი მესამე მოქალაქე მზად არის გაიქცეს ქვეყნიდან, წარმოუდგენელ მასშტაბს მიაღწია ინფლანციამ, სიღარიბემ, ქვეყანამ ვერ მიიღო კანდიდატის სტატუსი და დიდია ალბათობა რომ დავკარგოთ ქვეყნის ევროპაში გაწევრიანების, ევროპული უსაფრთხოების, ევროპული ცხოვრების დონის, ევროპული კომფორტის, სამუშაო ადგილების შექმნის შანსი, ამ დროს მიღებული კანონების სტატისტიკით თავმოწონება არის ცრუ საქმე და სირცხვილი.
როცა ხელისუფლება ვერ გრძნობს პასუხისმგებლობას, ჩვენი, მოქალაქეების ვალია მოვთხოვოთ და პასუხი ვაგებინოთ მათ.
არ შეიძლება ადამიანის წამება და მოკვდინება ვაქციოთ პოლიტიკური ცხოვრების წესად, არ შეიძლება დროებითი ვითომ კეთილდღეობის სანაცვლოდ ქვეყნის ღალატი იქცეს ნორმად.
და თუ ჩვენ ამას შევეგუებით და არ გვექნება პროტესტი, ჩვენ არ ვიქნებით ნეიტრალური დამკვირვებლები არამედ გავხდებით თანამონაწილეები ამ ყველაფრის რადგან დავუშვით და შევეგუეთ ამას”, – განაცხადა პაატა მანჯგალაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
