ანალიტიკოსი გია ხუხაშვილი სააგენტო ,,პარალელთან“ ინტერვიუს დროს კომენატრს აკეთებს ახალი სახალხო მოძრაობის ინიციატივაზე მთავრობის გადადგომისა და ეროვნული თანხმობის მთავრობის ფორმირების თაობაზე:
,,პირდაპირ გულახდილად ვთქვათ – ფაქტია, რომ ამაზე ხელისუფლება უარს ამბობს. ეს ვიცით უკვე და ახლა ჩვენ ილუზია არ უნდა გვქონდეს, რომ ეს მოთხოვნა იქნება შესრულებული. შესაბამისად, შემდეგ ნაბიჯზე გადავა ალბათ ყველაფერი, ეს მოთხოვნები ალბათ შეიცვლება.
რომც წარმოვიდგინოთ, რომ ხელისუფლება ამ პირობაზე დათანხმებულიყო, ჩემი აზრით, ამ შემთხვევაში ძალიან ბუნდოვანია განვითარება. დავუშვათ დათანხმდა ხელისუფლება და ტექნოკრატიული, დროებითი მთავრობა შეიქმნა, რომელიც იმუშავებს ამ პირობებზე. დიდი ბოდიში, მაგრამ ეს პირობები, რაც წამოყენებულია მათი დიდი ნაწილის გაფორმება უნდა მოხდეს პარლამენტში. ამ დროს პარლამენტში ისევ რჩება ,,ქართული ოცნების“ უმრავლესობა, რომელიც პრინციპში პოლიტიკურად დაინტერესებული იქნება, რომ ამ პროცესის საბოტირება მოახდინოს.
როგორ წარმოუდგენია იგივე აი ამ ხალხს, რა უნდა მოხდეს? თუ ხელისუფლება მთლიანობაში არ შეიცვლება, თორემ ჩვენ ვცხოვრობთ საპარლამენტო ქვეყანაში, სადაც შესაბამის კანონებს იღებს პარლამენტი.
თუ ჩვენ მთავრობას ვცვლით სამოქალაქო საზოგადოებიდან, პარლამენტი, რომელმაც უნდა გააფორმოს ეს ყველაფერი – ისევ ,,ქართული ოცნების“ არის, მაშინ როგორ ვაკეთებთ ყველაფერ ამას?! – შეიძლება მივიღოთ მთელი პროცესი დისკრედიტაცია, საბოტაჟი და ერთი კრიზისიდან ახალ კრიზისში გადავავინაცვლოთ, მეტი არაფერი მოხდეს.
აქედან გამომდინარე, მე ვფიქრობ, საერთოდ ასეთ პირდაპირი დემოკრატიის აქტს, რასაც ახლა ახორციელებს სამოქალაქო საზოგადოება – მეტი სიცხადე სჭირდება. გეგმა, რასაც წამოაყენებენ, ხალხმა უნდა დაინახოს, რომ ეს იქნება ეფექტური და შედეგზე ორიენტირებული. შედეგში რას მივიღებთ ამ მთავრობის ცვლილებით – არ ჩანს. აი, ეს არის პრობლემა.
ხელისუფლება ჭიდაობა/არჭიდაობაზეა განწყობილი. არაფრის გაკეთებას არ აპირებენ და ისევ მორევაზე მიდიან. მეტს რას უნდა ველოდოთ?! რა გაცხადებები გააკეთეს ნახეთ ხომ?“, – განაცხადა გია ხუხაშვილმა.
ავტორი
ნინი ხიჯაკაძე
