პარლამენტის სესიაზე სიტყვით გამოსვლისას, “სტრატეგია აღმაშენებლის” ლიდერმა, დეპუტატმა გიორგი ვაშაძემ განაცხადა, რომ ევროკავშირში საქართველოს ინტეგრაციის მთავარი წინაღობა არის „ქართული ოცნება“:
„დღეს, დაჩქარებული წესით, პრეზიდენტთან დაკავშირებით, საკონსტიტუციო სასამართლოს შესახებ კანონში შესატან ცვლილებებს ვიხილავთ, მაგრამ დაჩქარებული წესი არასდროს გამოიყენება იმ რეფორმებისათვის, რაც საქართველოს ევროპაში ინტეგრაციას სჭირდება. როდემდე უნდა გაგრძელდეს ეს?!
სამწუხაროდ უნდა ვთქვა: დღეს, ევროკავშირში ინტეგრაციის მთავარი წინაღობა ხართ თქვენ – “ქართული ოცნება”. თქვენ არ გინდათ რეფორმები, რადგან ფიქრობთ, რომ სამართლიანი სასამართლოს პირობებში, ვერ შეინარჩუნებთ ძალაუფლებას. ფიქრობთ, რომ მიუკერძოებელი სამართალდამცავი ორგანოების შემთხვევაში ვერ შეინარჩუნებთ ძალაუფლებას.
ჯერ კიდევ არ არის გვიან, რომ გვქონდეს ერთიანი სამოქმედო გეგმა საქართველოს მშვიდობის და უსაფრთხოების უზრუნველყოფისთვის. გადაიდგას კონკრეტული ნაბიჯები ევროკავშირში ინტეგრაციისთვის, გადაიდგას კონკრეტული ქმედითი ნაბიჯები იმისთვის, რომ საქართველო იყოს ცივილიზებული სამყაროს გვერდით, ამ მართლაც ისტორიული დაპირისპირების და უმნიშვნელოვანესი გეოპოლიტიკური კატაკლიზმების პირობებში.
დღეს გავლებულია წითელი ხაზი და აქ შენ ხარ ხან ერთ მხარეს, არ მეორე მხარეს. სხვა გზა არ არსებობს“, – განაცხადა გიორგი ვაშაძემ.
