პარლამენტის ოპოზიციონერი წევრმა, გიორგი ვაშაძემ, პარლამენტის სხდომაზე გამოსვლისას განაცხადა, რომ ქვეყანაში მძიმე ეკონომიკური ვითარებაა, იზრდება უმუშევრობა, სოციალურად დაუცველთა რაოდენობა, მაგრამ, მისი თქმით, ამასთანავე არის უმძიმესი პოლიტიკური ვითარება.
„ქვეყანაში არის პოლარიზაცია, ურთიერთდაპირისპირება, ზიზღის ენა და რიტორიკა, თავდასხმები და კანონის პოლიტიკური მიზნებით გამოყენება. უწესობის წესად ქცევა! და რა ნაბიჯები გადადგა „ქართულმა ოცნებამ“ ქვეყანაში იმისთვის, რომ დამშვიდებულიყო სიტუაცია?
დავიწყოთ საკრებულოების თემით, ოპოზიციამ სადაც აიღო უმრავლესობა საკრებულოში, თქვენ ელემენტარული ძალაუფლების განაწილება არ გინდათ. პასუხისმგებლიანი ხელისუფლება თქვენს ადგილზე იტყოდა, თუ დაგიჭირა მხარი იმ საკრებულოში ადგილობრივმა მოსახლეობამ, მაშინ იტვირთე პასუხისმგებლობა იმ ქალაქის განვითარებაზე.
რაც შეეხება მედიასაშუალებებს, უპრეცედენტოდ მაღალი ჯარიმა გამოუწერეთ მთავარ არხს. არა იმიტომ, რომ მართლა ასე ფიქრობთ რომ კანონდარღვევაა, არამედ თქვენ არ მოგწონთ ის რაც ხდება ოპოზიციურ მედიაში და გინდათ, რომ გააკონტროლოთ იქაც სარედაქციო პოლიტიკა.
მართლმსაჯულება – მთელი მსოფლიო გეუბნებათ, რომ შეაჩეროთ მოსამართლეების დანიშვნის პროცესი, რომ ფუნდამენტური მართლმსაჯულების რეფორმა უნდა განხორციელდეს. თქვენ მაინც ჯიუტად აგრძელებთ თქვენსას.
მთელ მსოფლიოს და ქვეყანას გაუჯიუტდით რომ ქვეყნის მესამე პრეზიდენტი გადაგეყვანათ ნორმალურ სავადმყოფოში, რასაც თქვენივე დაკომპლექტებული სამედიცინო ჯგუფიც გეუბნებოდათ.
თუ თქვენ მართლა გინდათ, რომ ქვეყანა წინ წავიდეს, 19 აპრილის შეთანხმებიდან, რომელიც ჩვენი დასავლელი პარტნიორობის შუამდგომლობით გაფორმდა, კი არ გახვიდოდით, ახლა ის სამოქმედო გეგმა იქნებოდა ამ ქვეყნის განვითარების გეგმა და ეს მოხსნიდა პოლარიზაციას.
მთავარი პასუხისმგებლობა არის თქვენზე. თუ თქვენ მართლა გინდათ რამე შეიცვალოს ამ ქვეყანაში, გადადგით ნაბიჯები, აუცილებელია სამართლიანობა იყოს ქვეყანაში იმისთვის, რომ თითოეული მოქალაქის უფლება იყოს დაცული“, – განაცხადა გიორგი ვაშაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
