„სამარშრუტო ტაქსებზე აუცილებლად აღდგება სამართლიანობა და ადამიანები, რომლებმაც ეს სამარშრუტო ტაქსები განავითარეს, დაბრუნდებიან“, – განაცხადა „სტრატეგია აღმაშენებლის“ ლიდერმა გიორგი ვაშაძემ პარლამენტის დღევანდელ სხდომაზე.
გიორგი ვაშაძის განცხადებით, დედაქალაქის მერმა სამარშრუტო ტაქსების ჩანაცვლების ოპერაციით, რომელიც ე.წ. „ყვითელი მარშრუტკების“ „ლურჯი მარშრუტკებით“ შეცვლას ეხება, ჩვეულებრივი კორუფციული თაღლითობა განახორციელა, რითაც ყოველწლიურად 43 მილიონი ლარი „ამოუღო ჯიბიდან მეიჯარეებს, მძღოლებს, დისპეტჩერებს და 5 ათასამდე ოჯახი მშიერი დატოვა“.
“კახი კალაძეს ალბათ ყველა იცნობთ, ქალაქ თბილისის მერი რომ არის, ჯერჯერობით ყოველ შემთხვევაში, დარწმუნებული ვარ აღარ უნდა იყოს და ახლა მინდა ვისაუბრო იმ 43 მილიონიან სქემაზე, რომელიც მან მოპარა კონკრეტულ ადამიანებს და ჩაიდო ჯიბეში ან ვიღაცას გაუნაწილა. საქმე ეხება ყვითელ და ლურჯ სამარშრუტე ტაქსებს. მოხდა ისე რომ, დისპეჩერების ფული გაქრა, ეს ადამიანები უმუშევრად რჩებიან, სამარშრუტე ტაქსების მძღოლების ხელფასები 1500 ლარიდან 800 ლარამდე შემცირდა და ამასაც არ უხდიან, ხოლო მოიჯარეები საერთოდ ამოაგდეს ამ ბიზნესიდან და ერთ-ერთ კონკრეტულ კომპანიას ლურჯი სამარშრუტე ტაქსები, რომელიც იყიდა მერიამ, გადასცა მართვაში და უთხრა, რომ მეიჯარეებმა კი არ იშივონ ფული, მძღოლებმა კი არ წაიღონ, აი ამ კომპანიამ წაიღოს ეს ყველაფერი.
დავთვალეთ, რომ ყოველწლიურად ბატონმა კახა კალაძემ 43 მილიონი ლარი, ხაზს ვუსვამ – 43 მილიონი ლარი ამოუღო ჯიბიდან მეიჯარეებს, მძღოლებს, დისპეჩერებს და გადაანაწილა სადღაც. დარწმუნებული ვარ თვითონაც არ დარჩებოდა წილის გარეშე იმიტომ, რომ ცნობილია მისი „საგმირო საქმეები“ ქალაქ თბილისში. ეს არის ჩვეულებრივი კორუფციული თაღლითობა. 5000-მდე ოჯახი რჩება უბრალოდ მშიერი, მათ კახა კალაძემ ჯიბიდან ამოუღო 43 მილიონი ლარი. მე ამ ადამიანების გვერდით ვდგავარ და ჩვენ, „სტრატეგია აღმაშენებელი“, ჩვენი ფრაქცია ყოველთვის ვიქნებით უსამართლობის წინააღმდეგ მებრძოლი, ვამხელთ ყველა კორუმპირებულს და არცერთი წამით უკან არ დავიხევთ“, – განაცხადა გიორგი ვაშაძემ.
