დღეს საქართველოს პარლამენტის ბიუროს სხდომა გაიმართა, რომელსაც პარლამენტის თავმჯდომარის პირველი მოადგილე გიორგი ვოლსკი ატარებდა. პირველმა ვიცე-სპიკერმა სხდომის მონაწილეებს გააცნო კენჭსაყრელი და განსახილველი საკითხების ჩამონათვალი. განსახილველად წარმოდგენილი იყო აგრეთვე საქართველოს ორგანული კანონის პროექტი „საქართველოს ორგანულ კანონში „საქართველოს საარჩევნო კოდექსი“ ცვლილების შეტანის შესახებ“.
ფრაქცია „ჩვენი საქართველო – დამოუკიდებელი დეპუტატების“ წევრმა ბექა ნაცვლიშვილმა სხდომის წარმომადგენლებს განუცხადა, რომ დაარეგისტრირეს პარლამენტის რეზოლუციის პროექტი. აღნიშნულ საკითხთან დაკავშირებით ბექა ნაცვლიშვილი ცხადებს: „არის ერთგვარი ლაკმუსის ქაღალდი და ამ რეზოლუციის უარყოფა პირდაპირ იქნება პოლიტიკური ძალების ლუსტრაცია“.
ბექა ნაცვლიშვილის განცხადებას გამოეხმაურა ბიუროს სხდომის წამყვანი გიორგი ვოლსკი:
„მსურს მოგახსენოთ, რომ საერთოდ, ნებისმიერი კანონპროექტი საზოგადოდ შეიძლება ისე განვიხილოთ, როგორც ლაკმუსის ქაღალდი, როგორც ლუსტრაციის გარკვეული პირობა.
ლუსტრაცია მაინცდამაინც ცუდი სიტყვა არ არის, სადაც ირკვევა მხარეთა პოზიციები და ამის მიხედვით, საზოგადოება მსჯელობს ვის მისცეს ხმა, ვის დაუჭიროს მხარი, ვის მისცეს თავისი პოლიტიკური მხარდაჭერა.
აქედან გამომდინარე, თქვენ რასაც ითხოვთ, მომმართეთ და გავაკეთებ ამას, მაგრამ ასე ლაკმუსის ქაღალდით და ლუსტრაციით კოლეგების დაშინება არ არის სწორი. მით უმეტეს, ბიუროს სხდომაზე პოლიტიკური განცხადების გაკეთება მიღებული წესი არაა, დამკვიდრდა ეს წესი, თორემ…
ისე საქმიანია თქვენი წინადადება და ამ საქმიან წინადადებას საქმიანად უნდა განხილვა“, – განაცხადა გიორგი ვოლსკიმ ბექა ნაცვლიშვილის საპასუხოდ.
ავტორი
ნინი ხიჯაკაძე
