„ლეიბორისტული პარტიის“ ლიდერი, შალვა ნათელაშვილი შატილში დატრიალებულ ტრაგედიაზე პასუხისმგებლობას საქართველოს ხელისუფლებას აკისრებს და ხალხს ჰპირდება, რომ არჩევნების შემდეგ, ნებისმიერ მიუდგომელ წერტილში სამედიცინო დახმარების გამოძახება შესაძლებელი 10-15 წუთში იქნება:
„შატილის ტრაგედია, რომელსაც 17 ადამიანის სიცოცხლე შეეწირა, სამწუხაროდ, ისევ და ისევ შედეგია იმ ხელისუფლების დანაშაულებრივი უპასუხისმგებლობისა, რომლის მილიარდერმა ლიდერმა და 50-მა პარლამენტში წამოსკუპებულმა მილიონერმა დეპუტატმა არ გამონახა იმის საშუალება, რომ კლდის თავზე გამავალი გზების გვერდზე ჯებირი მაინც გაეკეთებინა.
რაც მთავარია, რეჟიმმა 20 წლის უკან, ჩვენ მიერ აღდგენილი სასწრაფო სამედიცინო სისტემა ჩამოშალა და შემთხვევის ადგილზე სასწრაფო ბრიგადის გამოძახებას 2 საათი დასჭირდა, რის შედეგადაც მსხვერპლი კატასტროფულ მასშტაბამდე გაიზარდა. სასწრაფო რომ ცოტა ადრე მისულიყო, ტურისტთა ნახევარის გადარჩენა მაინც მოხერხდებოდა.
31 ოქტომბრის შემდეგ, ვაცხადებ ქვეყნიერების გასაგონად, სასწრაფო დახმარების სისტემა განახლდება, უახლოესი მოდიფიკაციის საშუალებები შემოტანილი იქნება, სასწრაფო დახმარების ბრიგადებს შტატები დაემატება, სამედიცინო პუნქტები გაიხსნება და ყველა მიუდგომელ ადგილას ექიმის მისვლა 10-15 წუთში იქნება შესაძლებელი,
სახელმწიფოს მხოლოდ მაშინ აქვს უფლება, იწოდებოდეს სახელმწიფოდ, როცა მას ადამიანთა სიცოცხლის შენარჩუნებაზე გარანტია ექნება. სხვა შემთხვევაში, ის გახლავთ წამებისა და ადამიანთა წვალების მანქანა, რაც, სამწუხაროდ, ჩვენს რეალობაშია განსახიერებული,“ – განაცხადა შალვა ნათელაშვილმა.
ავტორი
ეკა ქაჩლიშვილი
