ანალიტიკოსი ზურაბ ბატიაშვილი სომხეთში 7 ივნისის დაგეგმილი არჩევნების გეოპოლიტიკურ მნიშვნელობაზე საუბრობს:
“რატომაა ასეთი მნიშვნელოვანი 7 ივნისის საპარლამენტო არჩევნები სომხეთში?
რეალურად ეს არჩევნები გეოპოლიტიკური რეფერენდუმია სომხეთის მომავალთან დაკავშირებით. ერთ მხარეს არის ფაშინიანის პროდასავლური პარტია და მეორე მხარეს – 3 პრორუსული პარტია;
ყველა გამოკითხვებით (მათ შორის, ოპოზიციის მონაცემებითაც), ფაშინიანის პარტია პირველ ადგილზე გადის. მთავარი კითხვაა, რა სხვაობით გაიმარჯვებს ფაშინიანი 3 პრორუსულ პარტიაზე ანუ შეძლებს თუ არა ის დამოუკიდებლად მთავრობის ჩამოყალიბებას;
ბუნებრივია, პუტინი ყველა სახის ზეწოლას (სომხური წარმოშობის ოლიგარქები თავისი თანხებით, ეკონომიკური ზეწოლა და მუქარები, სომხური ნაწარმის რუსეთში შეტანის აკრძალვა და ა.შ.) იყენებს ფაშინიანის დასამარცხებლად. მაგრამ ეს ამბავი რუსეთის სასარგებლოდ არ მუშაობს. ზეწოლის შედეგად, პირიქით, იზრდება ფაშინიანის რეიტინგი;
ცხადია, დასავლეთი (აშშ, ევროპა) ღიად უჭერენ მხარს ფაშინიანს და მის პოლიტიკურ პარტიას, რომელთა მთავარი მიზანია შეუქცევადი გახდეს სომხეთის დასავლური განვითარების გზა. თურქეთისა და აზერბაიჯანისთვისაც ფაშინიანია მისაღები;
არჩევნების შედეგები მნიშვნელოვანია ჩვენთვისაც. ჩვენ, რა თქმა უნდა, პროდასავლურ სომხეთს ვგულშემატკივრობთ. გვინდა, რომ მეზობლად დემოკრატიული სომხეთი გვყავდეს და არა რუსეთის სატელიტი. თან სომხეთი ცალკე აღებული ევროპული კუნძული ვერ იქნება რეგიონში. დასავლეთისთვის სომხეთთან ფიზიკურად დასაკავშირებლად გაიზრდება დემოკრატიული საქართველოს მნიშვნელობა;
ცხადია, პუტინი არჩევნებში დამარცხების შემთხვევაში შეეცდება სხვადასხვა სახის პრობლემების (ოპოზიციის ქუჩაში გამოსვლა, არეულობები, ძალადობა და ა.შ.) შექმნას ფაშინიანისთის. მაგრამ ასეთი სცენარისთვის ერევანი მზადაა და ადვილად არ ჩააბარებენ ქვეყანას რუსებს;
გამარჯვება ვუსურვოთ სომეხ ხალხს ამ გადამწყვეტ არჩევნებში! რუსეთი უნდა დამარცხდეს სომხეთშიც და მჯერა, ასეც იქნება!” – წერს ზურაბ ბატიაშვილი სოციალურ ქსელში.
