“იყო თუ არა რაიმე ფორმით ზურაბიშვილი ჩართული 4 ოქტომბრის ძალადობრივი აქციის მომზადებაში?” – ზაალ ანჯაფარიძე

ანალიტიკოსი ზაალ ანჯაფარიძე საქართველოს მე-5 პრეზიდენტ, სალომე ზურაბიშვილთან დაკავშირებით კონკრეტულ მინიშნებებს და ვარაუდებს გამოთქვამს:

“დაიწყო ოპერაცია “რიგითი სალომეს გადასარჩენად”. დაეწყვნენ ოპოზიციის “ექსპერტები” ხალხისთვის იმ ვერსიის თავსმოხვევაში, თითქოსდა პრეზიდენტის რეზიდენციაში შევარდნა იყო ხაფანგი სალომე ზურაბიშვილისთვის, რადიკალურ სცენარში მის ჩასათრევად, ხოლო “გამჭრიახი” სალომე მიუხვდა ჩანაფიქრს და დროზე გაემიჯნა.

სალომე ზურაბიშვილი, მისი სნობისტური ბუნებიდან გამომდინარე, ძალიან იშვიათად მიდის ხოლმე იმ აქციებზე, სადაც ის არ გახლავთ მთავარი ფიგურა.

4 ოქტომბერს მას ეჯღანებოდა მთავარ ფიგურად გადაქცევა, თუ რადიკალები პრეზიდენტის რეზიდენციას აიღებდნენ და გამაგრდებოდნენ. ზურაბიშვილი, რომელიც ადრე აცხადებდა რომ ემიჯნებოდა რადიკალიზმს, სრულიად შეგნებულად მივიდა ხელისუფლების დასამხობად გამიზნულ რადიკალურ აქციაზე, რომლის მეშვეობითაც ალბათ გეგმავდა მისი “ლეგიტიმურობის” კონვერტაციას პოლიტიკურ შედეგში, რა თქმა უნდა მისი გარე პატრონების მხარდაჭერით, რომლებსაც დღემდე ენა ვერ მოუბრუნდათ ცალსახად დაეგმოთ პრეზიდენტის რეზიდენციის ძალადობრივი შტურმი.

კომპეტენტურმა ორგანოებმა იციან თავიანთი საქმე, მაგრამ მაინც ვურჩევდი დაინტერესდნენ იმის გარკვევით იყო თუ არა რაიმე ფორმით ზურაბიშვილი ჩართული 4 ოქტომბრის ძალადობრივი აქციის მომზადებაში“, – წერს ფეისბუქის პირად გვერდზე ზაალ ანჯაფარიძე.