თბილისში მომხდარ ტრაგიკულ ფაქტს ეხმიანება “ერთიანი ნაციონალური მოძრაობის” პოლიტსაბჭოს თავმჯდომარე. ნიკა მელია მომხდარ ფაქტს ე.წ. “ბნელ 90-იანებს” ადარებს და განუკითხაობაზე აკეთებს აქცენტს:
“კომენდანტის საათია
ეს ხელს არ უშლით ღრეობის მოწყობაში შსს-ს თანამშრომლებს. არც იმაში, რომ გავიდნენ აივანზე და ცეცხლსასროლი იარაღიდან ჯერი გაუშვან.
და მერე რა ხდება?
როგორც იმ შორ და ბნელ 90-იანებში, ბრმა ტყვია კლავს მოპირდაპირედ, მერვე სართულზე მცხოვრებ უდანაშაულო ქალბატონს, რომელიც შინ, მშვიდად ტელევიზორს უყურებს. კლავს მოხუცი დედის თვალწინ.
ეს ხდება 2020 წელს, ვაჟა ფშაველას გამზირზე,” – წერს ნიკა მელია ფეისბუქის პირად გვერდზე.
გავრცელებული ინფორმაციით, ტრაგიკულ ფაქტი მოჰყვა გარდაცვლილის საცხოვრებელი სახლის მოპირდაპირე კორპუსში გამართულ ქეიფს, რა დროსაც ერთ-ერთმა პიროვნებამ, დაუზუსტებელი ინფორმაციით – სამართალდამცავმა, რამდენჯერმე გაისროლა, რაც საბედისწერო აღმოჩნდა შუახნის ქალბატონისათვის, რომელიც მკაცრი საგანგებო მდგომარეობის პირობებში ოჯახში იმყოფებოდა და ტელევიზორს უყურებდა მოხუც დედასთან ერთად.
ასევე ვრცელდება ინფორმაცია, რომ მოკლული ქალბატონი მომღერალ თიკა მახალდიანის დედა იყო.
“თიკა მახალდიანის დედას მოხვდა ვიღაც არასწორის ნასროლი ბრმა ტყვია,” – მომღერალ ოთო ნემსაძის ფეისბუქ-კომენტარი.