სტრასბურგში, ევროპის საბჭოს 48-ე სესია გაიმართა, რომელსაც ესწრებოდნენ ერთიანობა ნაციონალური მოძრაობის პოლიტიკური საბჭოს თავმჯდომარის მოადგილე თათია ნიკოლაშვილი და “ერთიანობა ნაციონალური მოძრაობის” პოლიტიკური საბჭოს წევრი სევდია უგრეხელიძე, როგორც საქართველოს დელეგაციის წევრები ევროსაბჭოს ადგილობრივ და რეგიონულ ხელისუფლებათა კონგრესში. სესიაზე სიტყვით გამოვიდა სევდია უგრეხელიძე, რომელმაც ისაუბრა ქალების პოლიტიკაში ჩართვისას, ოჯახური ძალადობის თუ სხვა მხრივ საქართველოში არსებულ პრობლემებზე:
“პოლიტიკაში მონაწილეობის შეზღუდვა ქალთა დისკრიმინაციის ერთ-ერთი ფორმაა. მასთან ერთად მუდამ არსებობს სწავლის, შრომის უფლების დარღვევა, ოჯახური ძალადობა და ზოგჯერ ფემიციდიც. ამიტომ არაა გასაკვირი საქართველოში უკუსვლა ამ მიმართულებით.
ჩვენ გვქონდა კანონი პარლამენტის საარჩევნო სიებში ქალთა კვოტის წახალისების შესახებ, რომელიც გაუქმდა. ასევე უდიდეს ზეწოლას განიცდიან პოლიტიკურ მანიფესტაციებში მონაწილე ქალები. პოლიციელები მათ ორგანიზებულად, სისტემურად აყენებენ სიტყვიერ და ფიზიკურ შეურაცხყოფას.
გვყავს პოლიტიკური პატიმარი, ჟურნალისტი ქალი მზია ამაღლობელი რომელზეც ისაუბრა ჩემმა კოლეგამ. ყველაფერი ეს ხდება ტრადიციების დაცვის და სხვა ფსევდო კონსერვატიული ფასეულობების სახელით, რაც უკვე სახიფათო ტენდენციად ყალიბდება არა მარტო საქართველოში. ჩვენ ერთად უნდა დავძლიოთ ეს ტენდენცია”, – განაცხადა სევდია უგრეხელიძემ.
ინფორმაციას “ერთიანობა ნაციონალური მოძრაობის” პრესსამსახური ავრცელებს
