კორონავირუსის გავრცელების გამო ქვეყანაში გამოცხადებულ საგანგებო მდგომარეობასთან დაკავშირებით, ხელისუფლებას მოსახლეობისთვის კონკრეტული დახმარებისკენ მოუწოდებს “ლეიბორისტული პარტიის” თავმჯდომარე შალვა ნათელაშვილი:
,,მსოფლიო პრაქტიკით, ეპიდემიების დროს საგანგებო მდგომარეობა ნიშნავს საგანგებო ზრუნვას ბინაში გამოკეტილ, სამსახურ აღკვეთილ და ვალში ჩავარდნილ მოქალაქეებს, რომელთა უდიდესი ნაწილი ღატაკია.
მოვითხოვთ ხელისუფლებისაგან, საერთაშორისო პრაქტიკაში აღიარებული წესებით, დაუყოვნებლივ გასცეს თითოეულ ოჯახზე 1000 ლარი დახმარება, დაადგინოს ზღვრული ფასები პროდუქტებზე, წამლებზე, ჩამოაწეროს კომუნალური და საბანკო დავალიანებები.
კეთილი ინებონ და მოპარულიდან ათეულობით მილიონიდან თანხა შემოიტანონ გადარჩენის ფონდში ბატონებმა, რომელთაც ხელმძღვანელობს ქვეყნის მმართველი ბიძინა ივანიშვილი.
მე არ მითქვამს თქვენთვია რაიმე განსაკუთრებული თუ სენსაციური და საერთოდაც მიმაჩნია, რომ ასეთი ეპიდემიების ფონზე რაიმე პარტიული კინკლაობა, რაიმე გამოდავება, პიარზე მუშაობა უზნეობაა. დღეს ჩვენ ყველამ ძალღონე წავმართოთ მოსახლეობის სიცოცხლის და ჯანრთელობის გადასარჩენად.
მე გუშინ მოვისმინე საგანგებო მდგომარეობის გამოცხადებასთან დაკავშირებით ბატონ პრემიერ-მინისტრის განცხადება, პათოსით აღსავსე იმის თაობაზე, რომ მათთვის თურმე მთავარია ადამიანის სიცოცხლე და ჯანმრთელობა. ძალიან მინდა დავიჯერო, მაგრამ როცა ვიხსენებ, თუ როგორ გაწირეს შიმშილისათვის ადამიანები, ამ 8 წლის განმავლობაში, როგორ მოატყუეს და გადაყარეს, 20 ივნისს როგორ გამოთხარეს ბავშვებს თვალები, როგორ მოკლეს საკუთარ საწოლში თემირლან მაჩალიკაშვილი, ძალიან მეეჭვება, რომ ისინი მართლაც ზრუნავდნენ ჩვენს სიცოცხლესა და ჯანმრთელობაზე.
ეს არ არის საგანგებო მდგომარეობა!
ეს კანიბალური საგანგებო მდგომარეობაა!”- განაცხადა შალვა ნათელაშვილმა საგანგებო ბრიფინგზე.
