“საქართველო გადარჩება – ერთი წესიერი მოსამართლე გამოჩნდა” – სალომე ზურაბიშვილი ვლადიმერ ხუჭუას გადაწყვეტილებაზე

საქართველოს პრეზიდენტი თეთრიწყაროს მოსამართლის გადაწყვეტილება, 30 საარჩევნო უბანზე არჩევნების შედეგების გაუქმებასთან დაკავშირებით, ემოციური შეფასებებით ეხმაურება:

“საქართველო გადარჩება – ერთი წესიერი მოსამართლე გამოჩნდა, ერთი ღირსეული დიპლომატი და უამრავი უცნობი გმირი – ისიც არ დავივიწყოთ, რომ ერთგულ და გულანთებულ მოქალაქეს არაფერი გამოლევს ამ ქვეყანაში. თავდაცვაში, პოლიციაში თუ რიგით მოქალაქეებთა შორის არიან ის პიროვნებები, რომლებიც საქართველოს ოდიდან ქმნიდნენ. დღეს ყველანი ერთად ქმნიან უზარმაზარ ძალას, რომელიც ქვეყანას იცავს და დაიცავს მარად“, – წერს ფეისბუქის პირად გვერდზე სალომე ზურაბიშვილი.

ინფორმაციისთვის: თეთრიწყაროს სასამართლომ, ,,საიას” სარჩელი დააკმაყოფილა ხმის ფარულობის დარღვევასთან დაკავშირებით და თეთრიწყაროს და წალკის ელექტრონულ უბნებზე 30 უბნის შედეგები გააბათილა. გადაწყვეტილება მოსამართლე ვლადიმერ ხუჭუამ მიიღო.