სამოქალაქო აქტივისტი, ტატო ბასილაია სააგენტო ,,პარალელთან” კომენტარს აკეთებს, სადაც საუბრობს ქვეყნის ევროპულ მომავალსა და იმ ბრძოლაზე, რომელიც ისტორიულად საქართველოს თავისუფლებისკენ არის მიმართული:
,,ზოგადად, არ მესმის ადამიანების, რომლებიც ამბობენ, რომ აპოლიტიკურები არიან. საერთოდ პოლიტიკა და პოლიტიკოსები არიან ისინი, ვინც ჩვენი ქვეყნის ცხოვრებაში ზეგავლენას ძალიან ბევრ ფაქტორზე ახდენენ. რთულია არ იყო დაინტერესებული პოლიტიკით და მეტიც, მე თუ მკითხავთ, დანაშაულიც კი არის ჩვენს დღევანდელობაში აპოლიტიკურობა. იმ მძიმე სურათის ფონზე, რაც ქვეყანაში მმართველი ძალის მიერ მიღებული გადაწყვეტილებებიდან გამომდინარე არსებობს.
არ შემეძლო შორიდან მეყურებინა ამ ყველაფერისთვის და გადავწყვიტე ჩემი მცირედი წვლილი შემეტანა ქვეყნის წინსვლისთვის ბრძოლაში, დავმდგარიყავი ქართველი ხალხის და ჩვენი ახალგაზრდობის გვერდით. ჩვენი ჩართულობა ხომ აუცილებელი პირობა არის ქვეყნის სწორი განვითარებისთვის?
ჩვენი წინაპრები იბრძოდნენ თავისუფლებისთვის, რომელიც ოფლისა და სისხლის ფასად მოიპოვეს. ჩვენ არ გვაქვს მორალური უფლება უარი ვთქვათ ამ უმნიშვნელოვანეს მონაპოვარზე და ადამიანის უმნიშვნელოვანეს ფასეულობაზე სიცოცხლის შემდეგ, თავისუფლებაზე.
საბჭოთა კავშირიდან იმიტომ კი არ გამოვედით, რომ 2024 წელს რუსეთის იმპერიას შევერთებოდით. საქართველოს ერთადერთი გზა არის ცივილიზებული და თავისუფალი ევროპა – კავშირი, სადაც პატივს სცემენ ჩვენს ისტორიას, ენას, სარწმუნოებას, ტერიტორიულ მთლიანობას.
ამ ფონზე, რას აკეთებს ჩვენი მთავრობა?! მიგვაქანებს „ერთმორწმუნე მეგობრისკენ”, რომელიც მარტივი დასანახია, რომ ცხვირს ტყავში გახვეული მგელია და მხოლოდ მტრული მიზნები აქვს ჩვენს მიმართ. რუსეთის იმპერია ანგრევდა ეკლესიებს! გვართმევდა და გვართმევს ტერიტორიებს! 1978 წელს ,,დედაენის” წართმევაც დაგვიპირეს, მაგრამ მაშინდელმა პროგრესულმა ახალგაზრდობამ არ მისცა ამის საშუალება!
და დღეს, ჩვენ, ქართველ ახალგაზრდებს, რა თქმა უნდა, ჩვენი ქვეყნის ნებისმიერი თაობის წარმომადგენელთან ერთად მოგვეთხოვება, ვიდგეთ ისტორიის სწორ მხარეს და გადავარჩინოთ ჩვენი ქვეყანა გარუსებისგან!
სამწუხარო რეალობაა, რომ რუსეთის მიერ მართული ხელისუფლება გვყავს. ცუდია, რომ დღემდე არის საქართველოში მოქალაქე, რომელსაც რუსეთი მეგობრად მიაჩნია და მისკენ მიილტვის. იმედს ვიქონიებ, მსგავსი ადამიანების რიცხვი მინიმუმამდე შემცირდება მათი ცნობიერების ამაღლების ხარჯზე და ისწავლიან მტრისა და მეგობრის გარჩევას”, – განაცხადა ტატო ბასილაიამ.
ავტორი
ნინი ხიჯაკაძე
