ანალიტიკოს ნიკოლოზ მეტრეველის კონკრეტული შეფასებები და პრიორიტეტები ევროკავშირთან დაკავშირებით:
“სრულად ვეთანხმები შალვა პაპუაშვილის ძალიან მნიშვნელოვან განცხადებას, რომ ევროკავშირის გარეთ დარჩენა, შესაძლოა, პატარა სახელმწიფოსთვის უფრო სასარგებლოც კი აღმოჩნდეს.
სამწუხაროდ, საქართველოში დღემდე არსებობენ ადამიანები, რომლებსაც ჰგონიათ, რომ ევროკავშირი დედამიწაზე სამოთხის ფილიალია, სადაც არც კრიზისია, არც დანაშაული, არც პოლიტიკური პრობლემები და არც ორმაგი სტანდარტები.
რეალობა კი სრულიად სხვაგვარია. ევროკავშირი ჩვეულებრივი პოლიტიკური გაერთიანებაა თავისი პარტიკულარული ინტერესებით, შეცდომებითა და გამოწვევებით. ყველაზე გასაკვირი ის არის, რომ ზოგიერთი ქართველი პოლიტიკოსი ბრიუსელის ნებისმიერ განცხადებას უფრო იცავს, ვიდრე საკუთარი სახელმწიფოს ინტერესებს. თითქოს საქართველოს სუვერენიტეტი მხოლოდ მაშინ არის მისაღები, თუ ამას ვიღაც გარედან მოიწონებს.
ევროპასთან თანამშრომლობა მნიშვნელოვანია, მაგრამ პარტნიორობა მონობას არ ნიშნავს.
საქართველოს აღარ სჭირდება არც კერპების შექმნა და არც ილუზიებით ცხოვრება. ევროკავშირი არ არის წმინდა ძროხა, რომლის კრიტიკაც აკრძალულია. თუ ბრიუსელს აქვს უფლება, საქართველო აკრიტიკოს, საქართველოსაც აქვს უფლება, გააკრიტიკოს ევროპული ბიუროკრატიის შეცდომები და ორმაგი სტანდარტები.
ქვეყნის უსაფრთხოება, ღირსება და ეროვნული ინტერესები ვერ გახდება არც ერთი გეოპოლიტიკური პროექტის მსხვერპლი. საქართველო უნდა იყოს პარტნიორი და არა მოწაფე, რომელსაც მუდმივად ჭკუას არიგებენ“, – წერს ფეისბუქის პირა გვერდზე ნიკოლოზ მეტრეველი.
