„მსურს მივმართო ახალგაზრდებს, მთელ ჩვენს საზოგადოებას, ჩვენს უცხოელ პარტნიორებს, ძალიან კარგად შევაფასოთ შექმნილი ვითარება, ზუსტად შევაფასოთ ის, რაც გაკეთებულია 2012 წლიდან – საპირისპირო იმისა, რაც კეთდებოდა 2012 წლამდე და აქედან გამოიტანოთ დასკვნები – ვის უნდა საქართველოსთვის სიკეთე და ვის უნდა მისი ქაოსში გადასროლა“, – განაცხადა პარლამენტის თავმჯდომარის პირველმა მოადგილემ გიორგი ვოლსკიმ პლენარულ სხდომაზე პოლიტიკური განცხადებების დროს.
მისი თქმით, ახალგაზრდებს სახელისუფლო გუნდის წარმომადგენლებიც ხვდებიან და კარგად ჩანს, რომ ქუჩაში მართლაც რეალურად არის ის განწყობა, რომელიც აგრესიას წარმოშობს და ამაში „ლომის წილი“, შეიძლება ითქვას, გარკვეული ინფორმაციის არარსებობას აქვს.
„პრაქტიკულად, არავინ იცის, სამწუხაროდ, არც იმ ახალგაზრდებმა, ვისაც შევხვდით და ვისაც გარკვეულ თემებზე სხვა პოზიცია აქვს, რომ აპრილის ბოლოს საქართველომ, ევროსაბჭოს 39 ქვეყანასთან ერთად, დააყენა საკითხი რუსეთისათვის ტრიბუნალის შექმნის შესახებ. იქამდე მოვიგეთ ოთხი საერთაშორისო სასამართლო. ამ სასამართლოს ბოლო განაჩენი განგრძობითი ოკუპაციის შესახებ 9 აპრილს გამოქვეყნდა და ისე ჩაიარა ამ თემებმა, თითქოს არაფერი ყოფილა.
ეს არასამთავრობოები კი იმ ხალხის გვერდით დგას, ვინც რუსეთს ტერიტორიებიც ჩააბარა და სტრატეგიული ობიექტებიც, უამრავი ადამიანი შესწირა. უფრო მეტსაც გეტყვით, ხელი მოაწერა რეზოლუციას, სადაც აღიარებენ, რომ საქართველო არის დამნაშავე მხარე და ოკუპაციაც სწორედ ამ დანაშაულის გამო მოხდა“, – განაცხადა გიორგი ვოლსკიმ.
როგორც პარლამენტის თავმჯდომარის პირველმა მოადგილემ აღნიშნა, ვიდრე კონსტიტუციაში გაკეთდებოდა ჩანაწერი ქვეყნის კურსის შესახებ, 2013 წლიდან მოყოლებული, ქვეყნის საგარეო კურსს ყველა მოწვევის პარლამენტი ამტკიცებდა და არავის შეუძლია დაასახელოს თუნდაც ერთი მაგალითი იმისა, როდესაც საქართველოს ხელისუფლებამ გადადგა ნაბიჯები საქართველოში, კავკასიაში რუსეთის ინტერესების სასარგებლოდ.
„მე თქვენ ათ მაგალითს დაგისახელებთ, როდესაც ის ადამიანები, ვინც დღეს ბაქიბუქობენ, რუსულ პოლიტიკას იყენებენ სასპეკულაციო თემად. მათ ყველაფერი გააკეთეს, რომ რუსეთის ინტერესები რეგიონში და საქართველოში ყოფილიყო გამარჯვებული. რაც შეეხება არასამთავრობო ორგანიზაციებს, კი ბატონო, შეიძლება ისინი შემოჭრილი იყვნენ პოლიტიკაში, აქ ზღვრის გავლება ძნელია, მაგრამ ყველაფერს აკეთებენ დესტაბილიზაციისთვის და ამ ფონზე ხელისუფლებაში იმ ხალხის მოსაყვანად, ვისზეც ვისაუბრე. ესაა რეალობა და ამ რეალობის უკან არავითარი სხვა სურათი არ არსებობს.
მსურს მივმართო ახალგაზრდებს, მთელ ჩვენს საზოგადოებას, ჩვენს უცხოელ პარტნიორებს, ძალიან კარგად შევაფასოთ შექმნილი ვითარება და გამოიტანოთ დასკვნები – ვის უნდა საქართველოსთვის სიკეთე და ვის უნდა მისი ქაოსში გადასროლა“, – განაცხადა გიორგი ვოლსკიმ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
