ჟურნალისტი, “ფორმულას” ტელეწამყვანი, ვახო სანაია ქვეყანაში შექმნილ სიტუაციას ბიძინა ივანიშვილთან კავშირში განიხილავს და კონკრეტულ პოზიციას აფიქსირებს:
“ივანიშვილს როცა ძალიან გაუჭირდება, ტაქტიკურ სვლებს მიმართავს. ტრიუკს – ამას ხან დიალოგი ერქვა, ხან მთლიანად პროპორციული, ხან თითქმის პროპორციული, ხან ნახევრად პროპორციული, ხან სტუმრიანობა, ხან ხათრიანობა, ხან ცალ-ცალკე შესვლა და ხან კოლექტიურად, ხან რა და ხან რა. სინამდვილეში ეს იყო დროის მოგება, მძევლებით ვაჭრობა, გაყალბებული არჩევნების თემის მიძინება, დაკარგული ლეგიტიმაციის შენიღბვა და არაერთი მსგავსი.
ის კომპრომისს არასდროს განიხილავს, მოჩვენებით კომპრომისზეც კი არ მიდის, თუ უკიდურესი კრიზისი არ უდგას. შესაბამისად, თუ მსგავს მანევრს მიმართავს, ესე იგი, ძალიან ახლოსაა ძალაუფლების დაკარგვასთან და დროის მოგება სჭირდება, ხალხის რწმენის შერყევა, უკეთ გადალაგება/გადამზადება, მორიგ საჭირო მომენტამდე მოცდა.
ასეთი კრიზისი, როგორიც დღესაა, ივანიშვილს არასდროს ჰქონია. პროტესტი დაუღალავი და სულ უფრო მზარდია. ქვეყნის გარეთ თუ შიგნით ყველასთვის ყველაფერი ცხადია. პროტესტი არ წყდება, სულ უფრო შეუპოვარი და მრავალრიცხოვანი ხდება, დასავლეთი კი ივანიშვილის წინააღმდეგ სიტყვიდან საქმეზე გადასვლის ეტაპზეა.
ივანიშვილის კრემლისტური პოლიტიკა აგებულია ტყუილზე. ყველაფერი მოიტყუა. ყველა სიტყვა გატეხა. ეს უნდა გვახსოვდეს!
არ არსებობს და ვერც იარსებებს რუსული კანონის კომპრომისული ვარიანტი. ,,ვიმსჯელოთ”, ,,ცვლილებები განვიხილოთ”, ,,ვეტომდე მოიცადეთ”, ესა, ისა – ეს მაიმუნობა არ უნდა გაუვიდეს. ის ახლა წყალში მაშველ რგოლს ეძებს.
რუსულ კანონზე გამოსავალი ესაა – ივანიშვილი უნდა დამარცხდეს ქართველ ხალხთან ბრძოლაში კონკრეტულად ამ რუსული კანონის ნაწილშიც და ზოგადადაც.
ამიტომ ყველაზე მნიშვნელოვანია:
1. ხალხის დაუღალავი პროტესტი;
2. დასავლელი მეგობრების მხარდაჭერა.
დღეს უნდა შეიკრიბოს ძალიან, ძალიან ბევრი ხალხი.
არ შეიძლება მსჯელობა იმაზე, უნდა იყოს თუ არა საქართველო დამოუკიდებელი.
სასაცილოა საერთოდ საუბარი ამაზე – მოდი გაგვაუქმებინეთ საქართველოს დამოუკიდებლობა ბარემ მესამე მოსმენითაც და მერე ვეტოს დაძლევამდე ვიმსჯელოთ, აბა, რა კოსმეტიკური ცვლილებებისთვის ვიქნებით მზადო.
არა რუსულ რეჟიმს !“, – წერს ფეისბუქის პირად გვერდზე ვახო სანაია.
