,,ლეიბორისტული პარტიის” თავმჯდომარე, შალვა ნათელაშვილი საგანგებო ბრიფინგზე მწვავე განცხადებას აკეთებს პარტია ,,ქართული ოცნების” დამფუძნებელსა და საპატიო თავმჯდომარე, ბიძინა ივანიშვილთან დაკავშირებით და მის დაპატიმრებას მოითხოვს:
,,ივანიშვილი აპირებს, მეოთხედ მოახდინოს ხელისუფლების უზურპაცია გაყალბებისა და სახელმწიფო გადატრიალების გზით, რის შემდეგაც მიჰყიდოს საქართველო მოსკოვს. ამ სიტუაციაში საჭიროა მთელი ეროვნული ენერგიის გაერთიანება, ხოლო საერთაშორისო თანამეგობრობიდან აუცილებელია არა თერაპიული, არამედ ქირურგიული ჩარევა.
ყველას კარგად მოგეხსენებათ, როგორ იქნა დაპატიმრებული საკუთარ სასახლეში პანამის დიქტატორი ნორიეგა, რომელმაც შემდგომ ციხეში დაამთავრა თავისი ცხოვრება. სწორედაც, იმის გამო, რომ ბიძინა ივანიშვილმა მოახდინა ქართული სახელმწიფოს შესყიდვა, მძევლად აიყვანა ჩვენი ხალხი, გადაიქცა რეგიონში მთავარ ნარკო-ბარიგად, იარაღის კონტრაბანდისტად, ბიტკოინებით შავი, რუსული ოლიგარქიული ფულის გამთეთრებლად; სწორედ, იმის გამო, რომ იგი ამ წუთში არის პუტინის მოკავშირე უკრაინის წინააღმდეგ აგრესიულ ომში – ბიძინა ივანიშვილზე მოვითხოვთ საერთაშორისო დაპატიმრების სანქციის გაცემას და საერთაშორისო პოლიციური ოპერაციის ჩატარებას, რათა იგი წარდგენილი იქნას საერთაშორისო ტრიბუნალზე ყველა საერთაშორისო და შიდა სამართლებრივი ნორმების დაცვით.
იმავდროულად, ჩვენ ვთხოვთ ვაშინგტონსა და ბრიუსელს დაასანქციროს იდეოლოგიური იარაღი ივანიშვილისა, ტელეკომპანია ,,იმედის”, ,,პოსტივის” და სხვათა სახით. აიკრძალოს მათი ტრანსილირება თანამგზავრული სისტემებიდან, წაიშალოს მათი გვერდები სოციალიურ ქსელებში.
საჭიროა, გამოაცხადოთ დიდი ჯვაროსნული ლაშქრობა სიმართლისათვის, მომავლისათვის, საქართველოს გადარჩენისათვის მთელი მსოფლიო დემოკრატიული საზოგადოების მხარდაჭერით რათა, ერთხელ და სამუდამოდ, პოლიტიკურად მიწის პირისგან აღიგავოს პროპუტინისტური მოღალატე ოლიგარქ ივანიშვილის რეჟიმი, რომელსაც ამდენი ვნება აქვს კიდევ დაგეგმილი ჩვენი ულამაზესი და უდიდესი ქვეყნისთვის”, – განაცხადა შალვა ნათელაშვილმა.
ავტორი
ნინი ხიჯაკაძე
