საქართველოს მე-3 პრეზიდენტი, მიხეილ სააკაშვილი მხარდაჭერისთვის მადლობას უხდის ევროპარლამენტარებს და ემოციური პოზიციით საზოგადოებას მიმართავს:
“ევროკავშირის ერთიანი საგარეო და უსაფრთხოების პოლიტიკის შესახებ ანგარიშის მოსმენისას, ევროპარლამენტმა კვლავ გაიმეორა ჩემი გათავისუფლების შესახებ მოთხოვნა და მოუწოდა პრეზიდენტ სალომე ზურაბიშვილს, ამისთვის გამოიყენოს თავისი კონსტიტუციური უფლებამოსილება. ევროპარლამენტის აზრით, ჩემი გათავისუფლება შეამცირებს პოლიტიკურ პოლარიზაციას ქვეყანაში.
მადლობა მინდა ვუთხრა ჩემს მეგობრებს ევროპარლამენტში, განსაკუთრებით ქალბატონ ანა ფოტიგას, რომლებიც ძალისხმევას არ იშურებენ საქართველოსთვის. მათ კვლავ დაგმეს რუსეთის მიერ საქართველოს სუვერენული ტერიტორიების ოკუპაცია და საოკუპაციო ხაზიდან ჩვენი მოქალაქეების გატაცება.
ქართველი ხალხის გამარჯვებაში, ჩვენ ბრძოლისუნარიანობაში, მე არასდროს შემპარვია ეჭვი. ამ ბრძოლაში ვარ ბოლომდე, თქვენთან ერთად. თავისუფლება და სიკეთე ყოველთვის დაამარცხებს მონობასა და ბოროტებას!
მე მჯერა, რომ საქართველოს საუკეთესო დღეები არის წინ!“, – აცხადებს მიხეილ სააკაშვილი.