“29 თებერვალს სრულდება დირექტორობის რეგისტრაციის მსურველთა ვადები, ამ მნიშვნელოვან პროცესში გვაქვს მნიშვნელოვანი კითხვები ბატონ მინისტრთან ბუნდოვან საკითხებზე”, – ამის შესახებ „სტრატეგია აღმაშენებლის“ ერთ-ერთმა ლიდერმა, ნანა ტოხვაძემ ისაუბრა.
ტოხვაძემ განათლების სამინისტროში, მინისტრ, გიორგი ამილახვარის სახელზე განცხადება შეიტანა. მისი თქმით, დირექტორების შერჩევის წესთან დაკავშირებით, ძალიან ბევრი კითხვა და ბუნდოვანება არსებობს, რომელიც უნდა იქნას განმარტებული, გიორგი ამილახვარის მხრიდან.
“29 თებერვალს, დირექტორობის მსურველ კანდიდატთა რეგისტრაცია სრულდება. კონკურსის გამჭვირვალობის, დემოკრატიულობისა და მაღალი სანდოობის დამზღვევ პროცედურებზე სამინისტროს მხრიდან განმარტებები არ ჩანს.
მივმართავ მინისტრ ამილახვარს, საზოგადოებას განუმარტოს:
1. რა კრიტერიუმებით შეირჩევა გასაუბრების კომისიის შემადგენლობა, რათა მაღალი სანდოობის ნაცვლად, კვლავ ძალაში არ დარჩეს კომისიები, როგორც “პოლიტიკური ფილტრი” არასასურველი კანდიდატების ჩამოსაშორებლად.
2. რამდენმა კანდიდატმა გამოუცხადა ნდობა ახალი შერჩევის წესს და დარეგისტრირდა კონკურსზე. აქედან რამდენია უკვე სერთიფიცირებული დირექტორობის მსურველი?
3. ინკლუზიური და მოქნილი პროცესის უზრუნველყოფისთვის მიღებულ ცვლილებებში, რატომ არ შეიქმნა 162 ტესტირებაგავლილი კანდიდატის პირდაპირ გასაუბრების ეტაპზე ჩართვის შესაძლებლობა? თუ ფიქრობთ, რომ გასული წლიდან დღემდე შეიცვლებოდა მათი აკადემიური ცოდნა?
4. რაც მთავარია, ამოიღეთ თქვენი ლექსიკონიდან დირექტორობის მსურველთა მიმართ მინიმალური სტანდარტის მოთხოვნა, წინააღმდეგ შემთხვევაში, სამართლიანად გვიჩნდება განცდა, რომ არა განათლების ხარისხის გასაუმჯობესებლად, არამედ სკოლებში ადგილების შესავსებად იწყებთ პროცესს – რაც ქვეყნის ინტერესების უგულებელყოფის და კანდიდატების რეპუტაციის შელახვის გარდა სხვა შედეგს არ იძლევა”, – განაცხადა ნანა ტოხვაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
