სოციოლოგიის დოქტორი, იაგო კაჭკაჭიშვილი “ქართული ოცნების” საპატიო თავმჯდომარის, ბიძინა ივანიშვილის მიმართ კონკრეტულ შეფასებებს აკეთებს პოლიტიკისა და ოჯახის თავისებურებების გათვალისწინებით
“პოლიტიკაში პასუხისმგებლობას აქვს თვისებრივად სხვა დატვირთვა, ვიდრე, მაგალითად, ოჯახში.
ოჯახში თუ ვინმეს (ვთქვათ, ოჯახის უფროსს) რაიმე სერიოზული შეცდომა მოუვა, მას ოჯახი აძლევს ამ შეცდომის გამოსწორების უფლებას – წარსული გამოცდილების და მომავალი დაპირებების გათვალისწინებით. ოჯახი ყოველთვის ცდილობს, რომ შეინარჩუნოს მისი წევრი, მისცეს „განწმენდის“ შესაძლებლობა და მხოლოდ უკიდურეს შემთხვევაში გარიყავს მას. შესაბამისად, ოჯახში ჩადენილ შეცდომებზე პასუხისმგებლობა პრინციპულად გულისხმობს რეაბილიტაციას.
პოლიტიკაში (დავაზუსტოთ – დემოკრატიულ პოლიტიკაში) სხვაგვარადაა (მით უფრო, როცა საქმე ხელისუფლებას ეხება). თუ ხელისუფალი სერიოზულ/საბედისწერო შეცდომას უშვებს, მას საჯარო სივრცე არ აძლევს იმის ფუფუნებას, რომ პოლიტიკაში დარჩეს და ცოდვები „ჩამოიბერტყოს“, ან სხვა – ალტერნატიული ზომებით დააბალანსოს.
დიდი დაკვირვება არ უნდა იმას, რომ ბიძინა ივანიშვილი პოლიტიკაში თავს ისე გრძნობს, როგორც ოჯახში. აღმოჩნდა, რომ ივანიშვილის მიერ დანიშნული თითქმის მთელი მთავრობა, ბევრი წლის განმავლობაში, არნახულ კორუფციულ ჭაობში იყო ჩაფლული. და რა მოხდა? ქ/ოცნება საზოგადოებას უმტკიცებს, რომ ამაში ივანიშვილის პასუხისმგებლობა ნულია; მეტიც, გვიმტკიცებენ, რომ ივანიშვილი „თეთრი ხელთათმანებით“ შეებრძოლა მასშტაბურ დანაშაულებს – ისე, რომ თავად არათუ არ დალაქავდა, არამედ ამ ბრძოლას გმირობადაც კი უთვლიან.
ასეა, როცა ხელისუფლებას არაფორმალური მმართველი ჰყავს, რომელიც ყოველთვის პოლიტიკურ სათბურში ცხოვრობს, ანუ – ოჯახში, სადაც მძიმე შეცდომებიც კი უნაშთოდ კონვერტირდება.
საქართველოში აუცილებლად უნდა დაბრუნდეს პოლიტიკა, როგორც საქმიანობის ფორმალური, საჯარო და ანგარიშვალდებული სივრცე. ეს ქართული საზოგადოების არსებითი ამოცანაა“, – წერს იაგო კაჭკაჭიშვილი სოციალურ ქსელში.
