,,ლეიბორისტული პარტიის” თავმჯდომარე, შალვა ნათელაშვილი საგანგებო ბრიფინგზე განცხადებას აკეთებს რესპუბლიკური საავადმყოფოს დემონტაჟის შეჩერების საქმეში პარტიის მიერ დაწყებულ სამართლებრივ ბრძოლას:
,,გვინდა მოგახსენოთ, რომ ,,ლეიბორისტული პარტიის” სარჩელი რესპუბლიკური საავადმყოფოს დანგრევის თავიდან ასაცილებლად მიღებულია სამართალწარმოებაში და სამშაბათს, 27 თებერვალს 14:30 საათზე საქალაქო სასამართლოში დანიშნულია პირველი ოფიციალური სხდომა.
ხელისუფლებამ, რომლის ფაქტობრივი მეთაური, ივანიშვილი აპირებს ამ უნიკალური კომპლექსის ადგილას ბიზნესს, დიდი სასახლეების მშენებლობას მილიარდიანი მოგებისთვის, საზოგადოების აქტიურობის, ექიმთა გაუტეხლობის, ჩვენი ბრძოლის შედეგად, იძულებული გახდა დაეწყო მოლაპარაკება, კონსულტაციები სამედიცინო კოლექტივთან.
მაგრამ, როგორც ბიბლია გვაფრთხილებს – ,,არ დაიჯეროთ ოდეს მგელნი მოვიდიან ცხვრის ქურქში“.
ეს რეჟიმი ისევ ის რეჟიმია, რომელიც მოლაპარაკებას იწყებდა 20 ივნისს ღამეს და რამდენიმე წუთის შემდეგ გახსნეს ცეცხლი და ბავშვებს დათხარეს თვალები.
ამიტომ, სიფრთხილეს და მზად ყოფნას არასოდეს თავი არ სტკივა. ჩვენ უნდა ვიყოთ მზად იმისათვის, რომ ღირსეული პასუხი მივცეთ რეჟიმის მცდელობას, მოგვისპოს ჩვენი საარსებო ინფრასტრუქტურა, ჯანდაცვის და სიცოცხლის გადარჩენის ცენტრები, გარეთ გაყაროს სამედიცინო სისტემის ღირსეული მუშაკები. უნდა ვიყოთ მზად იმისათვის, რომ ჩვენ თვითონ დავიცვათ ჩვენი ქვეყანა, ხალხი, ინტერესები და სასიცოცხლო სფეროები“, – განაცხადა შალვა ნათელაშვილმა.
ავტორი
ნინი ხიჯაკაძე
