“მისდა უნებლიეთ, ზურაბიშვილი “ნაცებისთვის” გახდა “ოქროს თევზი”, რომელსაც სულ უფრო მეტ მოთხოვნას უყენებენ” – ზაალ ანჯაფარიძე

ანალიტიკოსი ზაალ ანჯაფარიძე ეხმაურება მიხეილ სააკაშვილის გათავისუფლების მოთხოვნით “ნაციონალური მოძრაობის” მიერ დაწყებულ ხელმოწერების კამპანიას, რომლის მიზანია პრეზიდენტ სალომე ზურაბიშვილის მიერ მის ხელთ არსებული ბერკეტების გამოყენება საქართველოს მე-3 პრეზიდენტის მიმართ:

“ანუ, უკვე სააკაშვილის შეწყალებას კი არ ითხოვენ ზურაბიშვილისგან, რადგანაც ამ შემთხვევაში გამოვა, რომ მან კრიმინალი შეიწყალა, არამედ არც მეტი არც ნაკლები – მის გათავისუფლებას. თან ახლახანს ნაცების ერთ-ერთმა ლიდერმა ზურაბიშვილს “თვითმარქვია” და “ბიძინას დასმული” პრეზიდენტი უწოდა.

როგორ უნდა გაათავისუფლოს ზურაბიშვილმა სააკაშვილი? კონსტიტუციით მას ეს არ შეუძლია. „ვივა-მედთან“ მივარდება თავის ადმინისტრაციის თანხლებით?

მისდა უნებლიეთ, ზურაბიშვილი “ნაცებისთვის” გახდა “ოქროს თევზი”, რომელსაც სულ უფრო მეტ მოთხოვნას უყენებენ, რადგანაც მას ვალი დაადეს იმით, რომ იმპიჩმენტს გადაარჩინეს.

პოლიტიკური თუ მენტალური კრიზისის ერთ-ერთი ნიშანია აბსურდში გადაშვება, რასაც წარმატებით აკეთებს რადიკალური ოპოზიცია“, – წერს ფეისბუქის პირად გვერდზე ზაალ ანჯაფარიძე.