,,საგარეო საქმეთა სამინისტრო ანგარიშვალდებულია პარლამენტის მიმართ. შესაბამისად, საგარეო საქმეთა მინისტრი რეგულარულად მობრძანდება პარლამენტში. თუ ვინმეს აქვს იმის განცდა, რომ ეს უწყება საკმარის ინფორმაციას არ აწვდის საზოგადოებას, პარლამენტია ის ადგილი, სადაც ეს კითხვები უნდა დაისვას და პასუხები მივიღოთ“, – აღნიშნავს, ჟურნალისტებთან კომენტარში, საგარეო ურთიერთობათა კომიტეტის თავმჯდომარე, ნიკოლოზ სამხარაძე, საქართველოს საგარეო უწყების პასუხისმგებლობასა და ინვესტიციების მოზიდვის მხრივ აქტიურობასთან დაკავშირებით:
ასევე, საპარლამენტო უმრავლესობის წევრმა, ნიკოლოზ სამხარაძემ შეფასება გააკეთა ქვეყანაში შემოსულ უცხოურ ინვესტიციებთან დაკავშირებით:
,,რაც შეეხება ინვესტიციებს, მე როგორც ვიცი, 2023 წლის საბოლოო შედეგები, ჯერ არ არის გამოქვეყნებული ინვესტიციებთან დაკავშირებით.
2022 წელს საქართველოში იყო რეკორდული ინვესტიცია შემოსული საერთაშორისო პარტნიორებიდან. ყველაზე მეტი საგარეო ინვესტიცია ისტორიის მანძილზე 2022 წელს შემოვიდა.
შესაბამისად, მე არ ვიცი, რას გულისხმობენ ჩვენი ოპონენტები, როდესაც ამბობენ, რომ მუშაობა არ მიმდინარეობს.
რა თქმა უნდა, მეც მინდა, რომ 500 მლრდ იყოს ინვესტიცია საქართველოში ყოველწლიურად, მაგრამ უნდა ვიყოთ რეალისტები და უნდა შევხედოთ იმ რეალობას, რომელიც არა მხოლოდ საქართველოშია, არამედ ჩვენს ირგვლივ. ვგულისხმობ ომებს – რუსეთის აგრესიას უკრაინაში, სომხეთ-აზერბაიჯანის დაძაბულობას, ახლო აღმოსავლეთში კონფლიქტებს და ა.შ. ეს ყველაფერი გასათვალისწინებელია“, – განაცხადა ნიკოლოზ სამხარაძემ.
ავტორები:
ალექსანდრე ლეჟავა
ნინი ხიჯაკაძე
