“რადიკალური ოპოზიციის, კოლექტიური “ნაცმოძრაობის” საქმიანობა არის მიმართული პირდაპირ სახელმწიფოს წინააღმდეგ, ეკლესიის წინააღმდეგ და იმ ყველაფრის წინააღმდეგ, რაზეც დგას ჩვენი ქართული იდენტობა” – ირაკლი კობახიძე

ჩინეთში ვიზიტით მყოფი ,,ქართული ოცნების” თავმჯდომარე, საპარლამენტო უმრავლესობის ლიდერი ირაკლი კობახიძე ჟურნალისტებთან კომენტარში ეხმაურება პარლამენტის თავმჯდომარის, შალვა პაპუაშვილის განცხადებას, მწვავე შეფასებებს აკეთებს ოპოზიციასთან მიმართებაში და მათ სახელმწიფოსა და ეკლესიის წინააღმდეგ მიმართულ საქმიანობაში ადანაშაულებს:

,,წლების განმავლობაში ჩვენ ვხედავთ, რომ ამ ადამიანების, რადიკალური ოპოზიციის, კოლექტიური “ნაცმოძრაობის” საქმიანობა არის მიმართული პირდაპირ სახელმწიფოს წინააღმდეგ, ეკლესიის წინააღმდეგ და იმ ყველაფრის წინააღმდეგ, რაზეც დგას ჩვენი ქართული იდენტობა. ეს არის მათი პოლიტიკის ერთ-ერთი მთავარი ხაზი და მთავარი მიმართულება.

რა თქმა უნდა, ჩვენ ამას უნდა დავუპირისპირდეთ და ამას, პირველ რიგში, ქართული საზოგადოება უნდა დაუპირისპირდე, აუცილებლად დაუპირისპირდებდა და მორიგი განაჩენი დადგება ამ საპარლამენტო არჩევნების შემდეგ’’, – განაცხადა ირაკლი კობახიძემ.

ინფორმაციისთვის: პარლამენტის თავმჯდომარე, შალვა პაპუაშვილი, სოციალურ ქსელში გამოქვეყნებულ პოსტში ეხმიანება სამების საკათედრო ტაძარში დასვენებული, სტალინის გამოსახულებიანი ხატის ირგვლივ განვითარებულ მოვლენებს, ასევე შობის 7 იანვარს აღნიშვნის თემას თუ სხვა საკითხებს და მათ რადიკალური ოპოზიციის მხრიდან საქართველოს ეკლესიისა და “ქართული ოცნების” წინააღმდეგ მიმართულ ქმედებად აღიქვამს.

ავტორი
მარიამ ხაჩირაშვილი