ორგანიზაცია ,,სასამართლოს გუშაგის” დამფუძნებელი, ნაზი ჯანეზაშვილი ჟურნალისტებთან იმ პრობლემების შესახებ საუბრობს, რასაც აწყდება სასამართლოებიდან საჯარო სტატისტიკური ინფორმაციების მიღების მცდელობისას და რაზეც ყურადღება გაამახვილა სასამართლო სისტემის ერთ-ერთ დახურულ შეხვედრაზე:
,,საქართველოში, ერთადერთი სასამართლო, რომელიც ყველაზე დროულად და ყველაზე ხარისხიანად გასცემს ინფორმაციას – ეს არის რუსთავის საქალაქო სასამართლო. დანარჩენ შემთხვევებში, უმეტესად გვაქვს პრობლემები და უმეტესად ვხედავთ, რომ ისინი ან არ ამუშავებენ ამ ინფორმაციას, ან ეზარებათ ინფორმაციის მიწოდება სამოქალაქო საზოგადოების და მკვლევრებისთვის, ან უბრალოდ ცდილობენ, რომ ინფორმაცია დამალონ იმისთვის, რომ საზოგადოებას, რაც შეიძლება, ნაკლები მონაცემები ჰქონდეს იმაზე, თუ რა ხდება სასამართლოში შიგნით.
დავუშვათ საქმეთა გაჭიანურებასთან დაკავშირებით, რა სტატისტიკურ მონაცემებს ფლობს სასამართლო სისტემა? რამდენი საქმე გაჭიანურდა? რამდენი საქმე განიხილეს ვადებში? – ეს ინფორმაცია ჩვენ არ მოგვაწოდეს.
მე არ ვიცი შიგნითაც ამას ამუშავებენ თუ არ ამუშავებენ, ადევნებენ თუ არა თვალს, როგორია სასამართლოს მუშაობის ხარისხი, მაგრამ ჩვენ არ გვაძლევენ ამ ინფორმაციას იმიტომ, რომ არ გვქონდეს საშუალება, სრული სურათი შევქმნათ, სრულად ვაწარმოოთ ჩვენი კვლევები’’, – განაცხადა ნაზი ჯანეზაშვილმა.
ავტორი
მარიამ ხაჩირაშვილი
