“ქართული ოცნების” ლიდერები და არა მარტო, აკეთებენ კონკრეტულ განცხადებებს და ამტკიცებენ რომ ოპოზიციის ცალკეული წარმომადგენლები არ არიან დაინტერესებულები საქართველოსთვის ევროკავშირის კანდიდატი ქვეყნის სტატუსის მინიჭებაში და ხელს უშლიან პროცესს. აღნიშნულ პოზიციას მწვავე შეფასებებით ეხმაურება იუსტიციისა და განათლების ყოფილი მინისტრი, ნიკა გვარამია:
“დაიწყო “ქართული ოცნების” პროპაგანდამ ჩვენი შემზადება ევროკავშირის სტატუსზე უარისთვის.
სულ ტყუილად: არ გამოვა არავიზე გადაბრალება, რამდენსაც არ უნდა გეხმარებოდნენ გაუგებარი მავნებლური და “ოცნების” პროპაგანდაზე უცნაურად და ზოგჯერ საეჭვოდაც წყლის დამსხმელი განცხადებებით ზოგიერთი უმწიფარი ოპიზიციონერი და არასამთავრობო სექტორის ზოგიერთი უმწიფარი წარმომადგენელი.
არ გამოვა გადაბრალება, იმიტომ რომ თუ ვერ მივიღებთ კანდიდატის სტატუსს, მხოლოდ იმიტომ რომ ოცნება გამალებით საბოტირებს პროცესს და ზემოხსენებული ზოგიერთის “მაინც” და თვალის ჩაპაჭუნება ფეხებზე კიდია იქ ყველას და მხოლოდ აღიზიანებს.
საკუთარი გეოპოლიტიკური ინტერესი თუ უკარნახებთ, მოგვცემენ.
ქვეყანაში, სადაც დემოკრატია დანგრეულია და ევრორეკომენდაციების 2/3 შეგნებულად არათუ არ სრულდება, არამედ მიზანმიმართულად უარესდება, ვერავითარი სხვა მოტივაცია ბუნებაში ვერ იარსებებს: ვერც სოციოლოგია, ვერც ქართული პოლიფონია, ვერც ვეფხისტყაოსანი და ვერც სალომე ზურაბიშვილის ტურნეები“, – წერს ფეისბუქის პირად გვერდზე ნიკა გვარამია.
