„ძალიან საინტერესო და საქმიანი მოხსენება იყო და რამდენიმე ციფრზე გავამახვილებ ყურადღებას. ძირითადად მაინც, ეკონომიკის ზრდის ტემპებსა და პროგნოზზე იყო საუბარი. 2025 წლისთვის, საშუალოდ, ერთ სულ მოსახლეზე შემოსავალმა უნდა მიაღწიოს მინიმუმ 25 ათას ლარს და 2028 წლისთვის, საშუალოდ, აღმოსავლეთ და ცენტრალური ევროპის ქვეყნებს უნდა გაუთანაბრდეს. რა თქმა უნდა, ეს არ არის ადვილად მისაღწევი ამოცანა, თუმცა შესაძლებელია. ამისთვის გვჭირდება მარტივი რამ – შევინარჩუნოთ მშვიდობა და სტაბილურობა ქვეყანაში, გრძელვადიანი სტაბილურობა“, – განაცხადა საპარლამენტო უმრავლესობის წევრმა, პოლიტიკური ჯგუფის ,,ხალხის ძალის“ თავმჯდომარემ სოზარ სუბარმა პლენარულ სხდომაზე „მინისტრის საათის“ ფორმატში, ეკონომიკისა და მდგრადი განვითარების მინისტრის, ლევან დავითაშვილის მოსმენის დროს.
როგორც მან აღნიშნა, ქვეყნაში უნდა იყოს სტაბილურობის განცდა, რათა ეკონომიკის სწრაფი ზრდა მოხდეს, თუმცა ამის ხელის შემშლელი ფაქტორი შეიძლება იყოს ოპოზიციის განცხადებები.
„უბრალოდ სტაბილურობა მარტო კი არ უნდა შევინარჩუნოთ, განცდა უნდა იყოს ამ სტაბილურობის, რომ ადამიანი არ გარბოდეს ქვეყნიდან, რომ შემოდიოდეს ინვესტორი, რომ ადგილობრივ ინვესტორსაც ფულის ჩადება აქ უნდოდეს და არა სხვა ქვეყანაში.
ყოველ წუთს, როდესაც ჩვენი ოპოზიციის მხრიდან ლაპარაკია სახელმწიფო გადატრიალებაზე, რევოლუციაზე, რა თქმა უნდა, ძალიან ძნელია სწრაფი განვითარების ტემპებზე იფიქრო, მაგრამ საბედნიეროდ, ჩვენს ოპოზიციას არა აქვს ძალა.
ამას ხედავს ხალხი და ამიტომაც არის რომ ეკონომიკის ზრდის ის ტემპი არის მიღწეული ბოლო სამი წლის განმავლობაში, რომელზეც ასე ამაყად ვსაუბრობთდა რომელიც აისახება არა უბრალოდ ციფრებში, არამედ მოსახლეობის კეთილდღეობაში“, – განაცხადა სოზარ სუბარმა.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს