„სტრატეგია აღმაშენებლის“ ლიდერები გიორგი ვაშაძე და სერგო ჩიხლაძე ვაშინგტონში უმაღლესი დონის შეხვედრებს აგრძელებენ.
ოპოზიციონერი ლიდერები ამჯერად სენატორ ჯინ შაჰინსა და მისი ოფისის წარმომადგენლებს შეხვდნენ. გიორგი ვაშაძის თქმით, შეხვედრის მთავარ თემებს სავიზო რეჟიმის გამარტივება და ამერიკასთან თავისუფალი ვაჭრობა წარმოადგენდა. როგორც ოპოზიციონერი ლიდერი აღნიშნავს ამერიკელი პარტნიორები დეტალურ ინფორმაციას ფლობენ საქართველოში არსებულ მძიმე სოციალურ და პოლიტიკურ ვითარებაზე, ამასთან, ისინი საქართველოს ევროპულ და ევროატლანტიკური ინტეგრაციის გზაზე სრულ მხარდაჭერას უცხადებენ:
„ძალიან მნიშვნელოვანი შეხვედრები გვაქვს სენატსა და კონგრესში, ადამიანებთან, ვინც საქართველოთი არიან დაინტერესებულნი და დაკავებულნი.
მთავარი საკითხი – მათთვის ყველასთვის ნათელია, თუ რას წარმოადგენს „ქართული ოცნება“, იგი არის პრორუსული პოლიტიკური ძალა, შესაბამისად, ამერიკელები აგრძელებენ ქართველი ხალხის მკაფიო მხარდაჭერას, მაგრამ მთავარი, რაც ჩვენ აქ ჩამოგვაქვს არის ის, რომ საქართველო არ გადაუხვევს ევროკავშირსა და „ნატო“-ში ინტეგრაციის გზას, ვერანაირი „ქართული ოცნება“ ამას ვერ შეძლებს. ამაში გვჭირდება ჩვენი ამერიკელი მეგობრების მხარდაჭერა და სიმართლე გითხრათ, დეტალური ინფორმაცია აქვთ და ძალიან კარგად ხვდებიან, რომ მომავალი არჩევნები საქართველოში არის არჩევანი რუსეთისკენ თუ ევროპისკენ და ამერიკისკენ.
მსოფლიოს სუპერსახელმწიფო მზადაა საქართველოს მხარში დაუდგეს ეკონომიკურადაც, სოციალურადაც, პოლიტიკურადაც და და ყველა მხრივ, მთავარია ჩვენ ხელი გავანძრიოთ, ეს არის ძალიან მნიშნელოვანი და დარწმუნებული ვარ, რომ ერთიანი ძალებით საბოლოოდ შევძლებთ „საფინიშო გოლის“ გატანას და საქართველო გახდება „ნატო“-სა და ევროკავშირის წევრი.
რამდენიმე საკითხი, რასაც ვაყენებთ ამ შეხვედრებზე ეს არის გამარტივებულ სავიზო რეჟიმზე საუბრის დაწყება, განსაკუთრებით სტუდენტებისთვისა და ახალგაზრდებისთვის, ასევე თავისუფალი ვაჭრობა ამერიკასთან“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
