,,ეროვნული ბანკის შესახებ“ ორგანულ კანონში შეტანილ ცვლილებას საქართველოს პრეზიდენტმა ვეტო დაადო. სალომე ზურაბიშვილის გადაწყვეტილებას კრიტიკულად აფასებს პარლამენტის პირველი ვიცე-სპიკერი, გიორგი ვოლსკი:
,,ნებისმიერ დაწესებულებაში ხელმძღვანელს უნდა ჰყავდეს პირველი მოადგილე, რომელსაც გადააბარებს უფლება-მოსილებებს, თუკი იგი გარკვეული მიზეზების გამო – ვერ ასრულებს თავის მოვალეობას. ამაში თითქოს და საკამათო არაფერი არ უნდა იყოს.
ვფიქრობ, გარკვეული პოლიტიკური ვითარება აიძულებს ან პრეზიდენტს გარკვეულ ინსპირაციას უქმნის იმისათვის, რათა დაუპირისპირდეს კიდევ ერთხელ იმ გადაწყვეტილებას, რომელიც თითქოსდა არც საკამათოა, არც შეიძლება ამ თემასთნ დაკავშირებით იყოს რაიმე წინააღმდეგობა“, – განაცხადა გიორგი ვოლსკიმ.
ინფორმაციისთვის: საპარლამენტო უმრავლესობამ პარლამენტში ,,ეროვნული ბანკის შესახებ“ ორგანულ კანონში შესატანი ცვლილებები დაარეგისტრირა. ცვლილებების შესაბამისად, ეროვნული ბანკის, დღეისათვის, არსებულ სამ ვიცე-პრეზიდენტს კიდე ერთი ემატება, რომელიც იქნება პირველი ვიცე-პრეზიდენტი და იგი, ბანკის პრეზიდენტის არყოფნის პერიოდში, მის მოვალეობას შეასრულებს.
ავტორი
ნინი ხიჯაკაძე
